ԵՐԵՎԱՆ, 5 դեկտեմբերի — Sputnik. Գոռ Մարգարյան. Անցած շաբաթվա ամենակարևոր նորությունների ցանկում տեղ գտած լուրերը կհետաքրքրեն առցանց խաղերի սիրահարներին, ռոբոտներով ու ընդհանրապես ՏՏ ոլորտով հետաքրքրվողներին:
Եվ նորից այդ Ֆեյսբուքը
Շատ քիչ ժամանակ անցավ այն խոսակցություններից, թե Ֆեյսբուքն իր Messenger-ում և նորությունների ժապավենում խաղային հարթակ է ուզում ստեղծել. այսօր արդեն հնարավոր է Instant Games խաղային հարթակի միջոցով 2D խաղեր խաղալ Messenger-ում և հավելվածի վեբ-տարբերակում: Մինչ այս հարթակի գործարկումը, Messenger-ում հնարավոր էր ընդամենը փոքրիկ խաղեր խաղալ, իսկ այժմ արդեն 17 խաղ է հասանելի:
Խաղի մեկնարկի համար պետք է բացել Messenger-ը, ընտրել ընկերներից որևէ մեկին, փորձել դիմադրել հաղորդագրություն գրելու գայթակղությանը, սեղմել գեյմփադի նշանը և խաղային կատալոգից ընտրել խաղը: Բացի մեսինջերից, խաղերը հասանելի են նաև նորությունների ժապավենում: Խաղի ընթացքում հավաքած միավորներով կարելի է գլուխ գովել ընկերների մոտ՝ «նվաճումները» տեղադրելով ֆեյսբուքյան պատին։
LinkedIn-ը արգելափակվեց
Ռուսաստանի Դաշնությունն արգելափակել է LinkedIn-ը: Պատճառն էլ շատ տրամաբանական է՝ սոցցանցն առանց զգուշացնելու՝ օգտատերերի անձնական տվյալները փոխանցել է երրորդ կողմին։ Հիշեցնեմ, որ LinkedIn-ն այս տարի 26 միլիարդ 200 միլիոն դոլարով ձեռք էր բերել Microsoft —ը: Ամբողջ աշխարհում այն 500 միլիոն օգտատեր ունի, որոնք փոխանակում են իրենց CV-ներն ու ներկայացնում իրենց մասնագիտական հմտությունները: Ռուսական արդարադատությունը պարտավորեցրել էր ընկերությանը, որ իր քաղաքացիների տվյալները պահի երկրի տարածքում գտնվող սերվերներում, սակայն LinkedIn-ը չի կատարել դատարանի որոշումը, և ահա տրամաբանական հետևանքը: Այս ծառայությունը հասանելի է նաև մեր երկրում. ստացվում է, որ հայաստանցի օգտատերերի անձնական տվյալները նույնպես տնօրինում է երրորդ կողմը:
Ամենայն հավանականությամբ LinkedIn-ի վնասազերծումից ոգևորված՝ Ռուսաստանի քաղաքացի Տիմուր Բուլատովը հայց է ներկայացրել Սանկտ Պետերբուրգի քաղաքային դատարան՝ պահանջելով Ռուսաստանի տարածքում արգելափակել նաև Ֆեյսբուքը։ Ակտիվիստ Բուլատովն իր հայցի մեջ նշում է, որ Ֆեյսբուքում տեղ են գտնում հակառուսական և հեղափոխական գրառումներ, և սոցցանցի միջոցով փորձ է արվում Ռուսաստանի հանդեպ ատելություն տարածել: Այս սուպերհայրենասերի հայցը մերժվել է, սակայն չի բացառվում, որ շուտով Ռուսաստանի տարածքում վերանանան առցանց կինոթատրոնները: Այս պահին օրենսդրական նախագիծ է մշակվում, որը կազդի նաև ամենախոշոր վիդեոհարթակի՝ Յութուբի վրա։ Ամենայն հավանականությամբ Յութուբը ստիպված կլինի անցնել արտասահմանյան հարթակներ, ինչը կհանգեցնի կապի բոլոր օպերատորների արժութային ծախսերի աճի և ծառայությունների որակի վատթարացման:
Nokia-ի վերադարձը
Բոլորս էլ կհիշենք, որ ժամանակին բջջային հեռախոս արտադրող լավագույն ընկերությունը համարվում էր Nokia-ն, իսկ հետո ժամանակները փոխվեցին և Apple-ն ու Samsung-ը թռիչք կատարեցին ֆիննական հսկայի գլխի վրայով ու, ըստ էության, կործանեցին նրան: Ինչևէ, Nokia-ն փորձում է վերադառնալ շուկա, սակայն դեռ պարզ չէ՝ արդյոք լեգենդար բրենդը կկարողանա պայքարել ամերիկյան ու կորեական մրցակիցների հետ: Դեռևս պաշտոնական տվյալներ չկան, խոսակցություններն ավելի շատ պտտվում են բամբասանքների տեսքով, իսկ բամբասանքները երբեմն նաև ճիշտ են լինում:
Եվ այսպես, սմարթֆոնը, որի անունը դեռ անհայտ է, հիմնվելու է Qualcomm Snapdragon 820 չիպսեթի վրա: Այն կհագեցվի 5,2 կամ 5,5 դյույմանոց էկրանով: Երկու տեսախցիկներն էլ կօժտվեն Karl Zeiss օպտիկայով, իսկ իրանը կլինի մետաղյա և ջրակայուն: Այսպիսի տվյալներով ու իր՝ դեռևս պահպանված հեղինակությամբ ծերուկ Նոկիային կհաջողվի ստանալ ճապոնական, կորեական և ամերիկյան դրոշակակիր սմարթֆոնների դեմ պայքարելու իրավունք:
Վկոնտակտեի նորույթը
Ինձ թվում է՝ շատ քիչ են այն մարդիկ, ովքեր չեն սիրում ռուսական Вконтакте սոցկայքը: Այն հայտնի է երգերի և ֆիլմերի ընտրանիներով և իր բավականին հաջող խմբերով: Շատերը գեղագիտական հաճույք են ստանում Вконтакте-ի նորությունների ժապավենը թերթելիս և նույնիսկ տհաճություն են զգում, երբ այդ պահին ստիպված են լինում որևէ մեկի նամակին պատասխանել:
Այ հենց այս տեսակ մարդկանց համար Պավել Դուրովի թիմը Windows և MacOS օպերացիոն համակարգերով աշխատող համակարգիչների համար մշակել է մեսսենջեր. այժմ հնարավոր է չկտրվել նորություններ թերթելու կարևորագույն գործից և միաժամանակ պատասխանել նամակներին: Բետա տարբերակն արդեն հասանելի է համակարգիչների համար:
Ռոբոտների աշխարհում
Ռոբոտներից շատերը լուրջ հաջողություններ են գրանցում, իսկ որոշներն էլ պատմության գիրկն են անցնում ծիծաղաշարժ ձախողումների համար: Այս շաբաթ ուշադրության կենտրոնում են հայտնվել ռոբոտներ Բալուն և Ծույլիկը: Երկրորդին կարելի է այդպես անվանակոչել, որովհետև ռոբոտը ստեղծվել է բարձրագույն ուսումնական հաստատության քննություններ հանձնելու համար, բայց չորս տարի շարունակ տապալում է քննությունները և չի կարողանում ընդունվել Տոկիոյի համալսարան: Արդեն հասցրել է հիասթափեցնել իր ծնողներին, և նրանք հրաժարվել են ծույլիկին կատարելագործելու նախագծից: Եթե համալսարան ընդունվել չի ստացվում, գուցե հնարավոր լիներ ինչ-որ արհե՞ստ սովորեցնել նրան, օրինակ՝ կոշկակարություն:
Իսկ ի՞նչ է իրենից ներկայացնում Բալուն: Ռոբոտներն ընդհանրապես շատ բարդ կոնստրուկցիա ունեն և բավական թանկարժեք են: Իսկ նրանց փչանալու հիմնական պատճառներից մեկը Երկրի ձգողականության ուժն է: Գրավիտացիայի դեմ պայքարելու համար Բալուին օժտել են այն արհամարհելու հմտությամբ. ռոբոտն ունի ոտքեր, բայց նրա վերին վերջույթը թեթև գազով լցված փուչիկ է, ինչը թույլ չի տալիս ընկնել: Նա չի ընկնում անգամ այն ժամանակ, երբ հարվածում են: Ամենայն հավանականությամբ, այս բարի ռոբոտի միջոցով հետագայում կկարողանան կատարելագործել ռոբոտների աշխարհը և այնպես անել, որ զգողականության ուժը նրանց համար խոչընդոտ չլինի: Մի խոսքով, այս շաբաթվա հերոս դարձած ռոբոտներից մեկը կարող է շատ լավ հեռանկար ունենալ, իսկ մյուսը կարող է մարդկանց պատմել իր անփառունակ ներկայի մասին:
