«Հայկական ժամանակ». Իրան-Հայաստան երկաթուղու հարցը կրկին շրջանառության մեջ
«Հայկական ժամանակ» թերթը գրում է. «Իրան-Հայաստան երկաթուղին, որի մասին հանրությունը, թերևս, արդեն հասցրել էր մոռանալ, կրկին մտել է շրջանառության մեջ: Այն տեղադրվել է ՀՀ տնտեսական զարգացման և ներդրումների նախարարության կայքում, որպես ներդրումային ծրագիր:
Նախարարությունը ներկայումս հավաքագրում է ներդրումային ծրագրեր, տեղադրում իր պաշտոնական կայքում և փորձում ներդրումներ գտնել դրանց համար: Կայքում արդեն իսկ տեղադրվել են մոտ երեք տասնյակ խոշոր ծրագրեր այլընտրանքային էներգետիկայից մինչև զբոսաշրջություն: Ամենամեծ ներդրում պահանջող ծրագիրը հենց երկաթուղին է, որը գնահատված է 3.2 միլիարդ դոլար: Թե որքանով է գրավիչ այս ծրագիրը պոտենցիալ ներդրողների համար, կարելի է կռահել:
Հայաստանը Իրանին կապող այս երկաթուղու գաղափարը ծնվել էր դեռ 12 տարի առաջ, իսկ 8 տարի առաջ Սերժ Սարգսյանը պաշտոնապես հայտարարեց, թե առաջիկա տարիներին Հայաստանը սկսում է կառուցել այն: Բայց մինչ օրս որևէ լուրջ ներդրողի այն չի հետաքրքրել: Փոխարենը դրա շուրջ պտտվում էին կասկածելի, որևէ պատմություն չունեցող, օֆշորներում գրանցված ինչ-որ կազմակերպություններ, որոնք ընդամենը իմիտացիա էին ստեղծում, թե ծրագրի շուրջ ինչ- որ գործընթացներ են տեղի ունենում:
«Ժողովուրդ». Արտակարգ իրավիճակ «Նուբարաշեն» ՔԿՀ-ում. երկու դատապարտյալ է դանակահարվել
«Ժողովուրդ» թերթը գրում է. «Երեկ՝ ուշ երեկոյան, «Ժողովուրդ» օրաթերթն ահազանգ ստացավ այն մասին, որ ՀՀ արդարադատության նախարարության «Նուբարաշեն» քրեակատարողական հիմնարկում արտակարգ վիճաբանություն է եղել: Մեր աղբյուրների փոխանցմամբ` ՔԿՀ 22 խցի երկու դատապարտյալ, ըստ նախնական տվյալների, դանակահարել են իրար: Երկուսի վիճակն էլ երեկ ծանր էր: Թե ինչն է եղել պատճառը, դեռեւս պարզել չհաջողվեց:
Երեկ «Նուբարաշեն» ՔԿՀ-ում վաղ առավոտից տեսակցությունները եւս սահմանափակ են եղել: Շատերին, այդ թվում միջադեպի մասնակից դատապարտյալներին, ընդհանրապես արգելել են որեւէ մեկի հետ խոսել: Ըստ երեւույթին, ՔԿՀ-ում լարված մթնոլորտը վաղ առավոտից է տիրել, եւ օրն ավարտվել է դանակահարությամբ:
«Ժողովուրդ»-ը տեղեկացավ, որ շտապ կանչով ՔԿՀ են ժամանել ՀՀ գլխավոր դատախազության աշխատակիցները, որոնք կալանավայրերի նկատմամբ վերահսկողական գործառույթ ունեն, եւ իրավապահ այլ մարմինների ներկայացուցիչներ: Նրանք տեղում քննչական աշխատանքներ են իրականացրել:
ՀՀ ԱՆ քրեակատարողական վարչության լրատվական ծառայությունից ի պատասխան մեր հարցի` ինչ է տեղի ունեցել «Նուբարաշեն» ՔԿՀ-ում, ասացին. «Այո, հաստատում ենք, որ եղել է միջանձնային միջադեպ։ Նյութեր են նախապատրաստվում։ Արդյունքների մասին կտեղեկացնենք լրացուցիչ»:
Հիշեցնենք` վերջին օրերին ՀՀ տարբեր քրեակատարողական հիմնարկներում աղմկահարույց դեպքեր են բացահայտվում: Նախ` քրեական գործեր հարուցվեցին «Դատապարտյալների հիվանդանոց» ՔԿՀ-ում մարմնավաճառներ մատակարարելու գործով:
Կալանավորվեցին քրեակատարողական հիմնարկի պետի նախկին տեղակալ Կարապետ Մկրտչյանը եւ պատասխանատու հերթապահ, արդարադատության փոխգնդապետ Խաչիկ Խաչատրյանը: Ապա հայտնի դարձավ, որ «Արթիկ» ՔԿՀ-ում Հովհաննես անունով դատապարտյալն է ինքնավնասում արել, մի քանի այլ դատապարտյալներ ծեծկռտուքի մեջ են հայտնվել եւ այլն»:
«Փաստ». Հայտնի է բանանի երկրորդ խոշոր ներկրողը
«Փաստ» թերթը գրում է. «Վարչապետ Կարեն Կարապետյանի հայտարարությունը, թե յուրաքանչյուր ոք կարող է ցանկացած ապրանք ներկրել Հայաստան, կարծես պատճառ է դարձել, որ հայաստանյան մեկ այլ ընկերություն, բանան ներկրի Հայաստան:
Բանանի ներկրումը Հայաստան իրադարձային է համարվում, քանի որ այս շուկայում երկար տարիներ մենաշնորհային դիրք է ունեցել «Քեթրին գրուպ» ընկերությունը: Վերջերս լրագրողները փորձում էին պարզել, թե ով է այն համարձակ երկրորդ ներկրողը, որի մասին հայտարարեց ՊԵԿ ղեկավար Վարդան Հարությունյանը:
«Փաստի» տեղեկություններով` շուկայում հայտնված բանանի նոր ներկրողը Սամվել Ալեքսանյանն է, ով իր առեւտրային ցանցերում սկսել է վաճառել հենց իր ներմուծած բանանը: Իհարկե, կան արդեն նաեւ երկրորդ եւ երրորդ ներկրողները»:
«Ժամանակ». Տեր-Պետրոսյանը Սերժ Սարգսյանին առաջարկ կանի
«Ժամանակ» թերթը գրում է. «Դեկտեմբերի 17-ին տեղի է ունենալու ՀԱԿ համագումարը, որի ժամանակ կուսակցության առաջնորդ, առաջին նախագահ Լևոն Տեր-Պետրոսյանը իշխանության հասցեին բավական մեղմ ելույթ է ունենալու՝ Սերժ Սարգսյանին ակնարկելով համագործակցության պատրաստակամության մասին։ Ծառուկյանի հետ չի ստացվում գործակցությունը, այլոց հետ հաջողության հասնելու հնարավորություններն ավելի մշուշոտ են։
Տեր-Պետրոսյանը հույս ունի՝ արցախյան կարգավորման հարցում Սերժ Սարգսյանն իր աջակցության կարիքը մշտապես զգալու է, ուստի առաջին նախագահը վստահ է, որ իշխանությունը կգտնի ՀԱԿ-ին նոր խորհրդարանում տեղ ունենալու ձևը՝ դաշինքով կամ առանց։
«Հրապարակ». Առողջապահության նախարարը իսկական գլխացավանք է դարձել ընտրությունների գնացող իշխանության համար
«Առողջապահության նախարար Լևոն Ալթունյանը մահացած ծննդկանների մասին սկանդալային հայտարարության և իր զավեշտալի նախաձեռնությունների աղմուկը դեռ չմարած, կրկին հայտնվել է քննադատության թիրախում։ Պատճառը նոր «հանճարեղ» գաղափարն է՝ առողջապահության ոլորտի կոռուպցիայի օրինականացումը։
Օրերս «Ազատություն» ռադիոկայանի եթերում նա հայտարարել է բժշկին տրվող «մաղարիչը» հարկելու իր մտադրության մասին։ Մեր տեղեկություններով՝ Ալթունյանի այս հայտարարությունները հարուցել են «բարձր ղեկավարության» զայրույթը։
Առողջապահական համակարգի գլխավոր «մենեջերն» իսկական գլխացավանք է դարձել ընտրությունների գնացող իշխանության համար և արդեն իսկ համալրել է այն «սև ցուցակը», որտեղ հանգրվանածները տեղ չեն ունենալու 2017-ի կառավարության կազմում»,-գրում է թերթը։
