Իրան-Հայաստան երկաթգծի կառուցումը փորձագետները 3,5 մլրդ դոլար են գնահատում։
Տոնոյանը նշում է` ցանկացած նախաձեռնության մեջ կարևորը նախ կամքն է, իսկ երկաթգծի առումով թե՛ Հայաստանը, թե՛ Իրանը երկաթգծի նախագիծն իրականություն դարձնելու ցանկություն ունեն։
«Մնում է մյուս կարևոր գործոնը` ֆինանսականը։ Այս համատեքստում առաջիկայում կերևա, թե ցանկությունը որքան է մեծ, ինչպիսի քաղաքականություն կորդեգրեն ծրագիրն իրականացնելու համար»,- ասաց Տոնոյանը։
ՀՀ կառավարությունը 2014 թ.-ի օգոստոսի 7-ին հավանություն է տվել Իրան-Հայաստան երկաթուղու շինարարության նախնական ծրագրին։ Երկաթուղու երկարությունը կկազմի 300 կիլոմետր։ Երկաթուղու ենթակառուցվածքում կներառվեն 19,4 կիլոմետր երկարությամբ 64 կամուրջներ, 102,3 կիլոմետր երկարության 60 թունելներ և 27 կայաններ։ Սպասվում էր, որ շինարարությունը կավարտվի 2022 թ.-ին, բեռնափոխադրումների ծավալը կկազմի տարեկան 25 միլիոն տոննա։ Երկաթուղու նախագիծը մշակել է Չինաստանի շինարարության և հաղորդակցությունների միջազգային ընկերությունը (CCCC International)։ Նախագծով հետաքրքրվում են չինական բանկերը, որոնք պատրաստակամություն են հայտնել ֆինանսավորել ծրագրի 60 տոկոսը։
