ԵՐԵՎԱՆ, 9 դեկտեմբերի — Sputnik. Էրեբունի բժշկական կենտրոնի հայ սրտաբանները սրտի բարդ վիրահատություններ են կատարում հոլանդական Ռոտերդամի Erasmus համալսարանի բժշկական կենտրոնի բժշկական գիտությունների դոկտոր, պրոֆեսոր Տամաս Սիլի-Տորոկի ղեկավարությամբ։
«Մենք ուզում ենք հարստացնել մեր գիտելիքները և առիթմոլոգիան դարձնել մեր աշխատանքի առավել զարգացած ուղղություններից մեկը։ Մենք հուսով ենք, որ Հայաստանի բոլոր այն բնակիչները, որոնք նման խնդիրներ ունեն, կկարողանան հետագայում բուժվել Հայաստանում` առանց արտասահման մեկնելու անհրաժեշտության», — լրագրողներին ասաց «Էրեբունի» բժշկական կենտրոնի առիթմոլոգիական ծառայության բժիշկ Միհրան Մարտիրոսյանը։
Մարտիրոսյանն ընդգծեց, որ բժիշկ Սիլի-Տորոկը հ
Մարտիրոսյանը, որը համատեղությամբ աշխատում է նաև Erasmus համալսարանի բժշկական կենտրոնում, հուսով է, որ Հայաստանն ապագայում ռոբոտների օգնությամբ աբլյացիայի անցկացման համակարգ կունենա։
«Հիմնականում աբլյացիա են անում այն մարդկանց, որոնց կյանքին վտանգ է սպառնում։ Նման դեպքերում այդ վիրահատությունները փրկում են մարդկանց կյանքը, քանի որ հանկարծահաս մահվան վտանգը բավական բարձր է»,- ասաց Մարտիրոսյանը։
Հոլանդացի մասնագետը Եվրոպայի շատ քաղաքներում ցուցադրական վիրահատություններ է անցկացնում։ Նրան զարմացրել է հայ բժիշկների պրոֆեսիոնալիզմի մակարդակը։
«Ես շատ երկրներում եմ եղել, սա իմ տեսած լավագույն բաժանմունքներից մեկն է։ Մենք մի քանի վիրահատություն ենք կատարել, կային մարդիկ, որոնք առանց դրա կարող էին մահանալ։ Շատ կարևոր է, որ երկրում զարգացած լինի առիթմիայի դեմ պայքարի ոլորտը»,- ասաց Սիլի-Տորոկը։
Նա հայ բժիշկների հետ արդեն մի շարք բացառիկ վիրահատություններ է կատարել, որոնք կշարունակվեն ևս 2 օր։
Ինչպես նշեց «Էրեբունի» բժշկական կենտրոնի սրտաբանական հիվանդանոցի ղեկավար, գլխավոր սրտաբան Համլետ Հայրապետյանը, սրտաբանությունն անքակտելիորեն կապված է տեխնիկայի հետ։
«Շատ կարևոր է տեխնիկական նորարարությունների արագ ներմուծումը։ Մենք դա անում ենք, բայց, միաժամանակ, պետք է բարձրացնել նաև պրոֆեսիոնալ մակարդակը։ Պրոֆեսորի այցելություններն ուղղված են հենց դրան` նոր տեխնիկական միջոցների ներմուծմանն ու մեր բժիշկների որակավորման բարձրացմանը»,— ասաց Հայրապետյանը։
Նրա խոսքով` աշխարհի, այդ թվում` Հայաստանի բնակչության 2 տոկոսն առիթմիա ունի։ Հիվանդների մի մասը տառապում է հիվանդության սուր ձևերով, որոնք հանկարծահաս մահվան վտանգ են պարունակում, իսկ դրա դեմ, առաջին հերթին, պետք է պայքարեն բժիշկները։
Ռադիոհաճախական աբլյացիան (ՌՀԱ) ուռուցքի վրա տեղային ներգործության մեթոդ է, որի կիրառմամբ կարելի է ոչնչացնել ուռուցքային օջախը բարձր ջերմային ազդակների միջոցով: Այս մեթոդը հիմնականում կիրառվում է լյարդի, թոքերի, երիկամների, վահանաձև գեղձի ինչպես առաջնային, այնպես էլ մետաստատիկ ուռուցքների բուժման համար: Մեթոդը քիչ տրավմատիկ է, կատարվում է համակարգչային տոմոգրաֆիայի պատկերների հսկողությամբ: Վիրաբույժը ուռուցքային օջախի մեջ է մտցնում հատուկ ասեղային էլեկտրոդ, որի միջոցով, ուղղելով փոփոխական ջերմային ազդակը դեպի ուռուցքային օջախի կենտրոն, ոչնչացնում է քաղցկեղային բջիջները: Ինչպես նշում են մասնագետները, ճիշտ ցուցումների դեպքում այս մեթոդը հանգեցնում է վերը հիշատակված օրգաններում ուռուցքային օջախների լիակատար ոչնչացման:
Ռադիոհաճախական թերմոաբլյացիան աշխարհում կիրառվում է մոտ 20 տարի, այսօր այն աշխարհում ուռուցքաբանության ոլորտում ամենաարդյունավետ բուժման մեթոդներից մեկն է: Հեղինակավոր հետազոտություններն ու վիճակագրությունը հաստատում են մեթոդի արդյունավետությունը, իսկ քանի որ այն նվազ տրավմատիկ է, չի վնասում ախտահարված օրգանը: Չեն կատարվում կտրվածքներ: Միջամտությունից հետո վերականգնողական շրջան գրեթե չի պահանջվում:
