ԵՐԵՎԱՆ, 31 հուլիսի — Sputnik. Հայաստանում, ինչպես նաև ողջ աշխարհում, բժիշկները մեծ ուշադրություն են դարձնում քաղցկեղային հիվանդություններին:
Օգոստոսի 1-3-ը Հայաստանում Ուռուցքաբանության ազգային կենտրոնի և «Հակաքաղցկեղային հայկական լիգայի» նախաձեռնությամբ կանցկացվեն Թոքերի քաղցկեղի կանխարգելման օրեր, որի շրջանակում ռիսկային խմբում ընդգրկված մարդիկ կարող են քաղցկեղի ժամանակին և այլ պաթոլոգիաների հայտնաբերման նպատակով կրծքավանդակի օրգանների անճար ռենտգեն անցնել:
Ուռուցքաբանության ազգային կենտրոնի և «Հակաքաղցկեղային հայկական լիգայի» տվյալներով՝ ռիսկային խմբի մեջ մտնում են 50-65 տարեկան մարդիկ, ծխողները (հատկապես նրանք, որոնք օրական ծխում են մեկ տուփ և ավելի), քրոնիկ հազ ունեցող մարդիկ:
Վիճակագրություն
Ուռուցքաբանության ազգային կենտրոնի տնօրենի տեղակալ Գագիկ Բազիկյանը և «Հակաքաղցկեղային հայկական լիգայի» ղեկավար Գրիգոր Բադալյանը նշում են, որ 2015թ-ին Հայաստանում արձանագրվել է թոքերի քաղցկեղի հիվանդության 1353 նոր դեպք: Միաժամանակ վերջին 5 տարվա ընթացքում այդ հիվանդությունը հայտնաբերվել 6180 այցելուի մոտ է, իսկ դա փոքր թիվ չէ Հայաստանի համար:
Բժիշկները նշում են, որ Հայաստանում տարեցտարի աճում է թոքի քաղցկեղով հիվանդների թիվը: Այսպես, 2013թ-ին այդ թիվը կազմել է 1138, 2014թ-ին՝ 1246, 2015-ին՝ 1353:
Վիճակագրական համաշխարհային տվյալները նույնպես ցավալի են: Աշխարհում նոր դեպքերի թիվն է 1,82 մլն մարդ, մահվան դեպքերը՝ 1,59 մլն:
Ազգի առողջության գրավականը
Բոլոր ցանկացողների համար ռենտգենագրական զննումներ կկազմակերպվեն օգոստոսի 2-ին և 3-ին «Սուրբ Գրիգոր Լուսավորիչ», «Էրեբունի», «Երևան», «Նաիրի» և «Սլավմեդ» բժշկական կենտրոններում՝ ժամը 9-ից 16-ը: Եթե ռենտգենը հայտնաբերի որևէ պաթոլոգիա, մասնագետները կհուշեն որտեղ է պետք դիմել հետագա ախտորոշման և բուժման համար:
Օգոստոսի 2-3-ը թոքերի անվճար ռենտգեն անցնելու համար անհրաժեշտ է նախապես գրանցվել (մինչև օգոստոսի 1-ի աշխատանքային օրվա ավարտը), զանգահարելով հետևյալ հեռախոսահամարներով՝ 010 287120, 091 525861: Մասնագետները հավելել են, որ թոքերի ռենտգենը կլինի անվճար:
Թոքերի «համաշխարհային» քաղցկեղը
Թոքերի քաղցկեղով հիվանդացության ամենաբարձր մակարդակը գրանցվել է Եվրոպայում և Հյուսիսային Ամերիկայում, ամենացածր՝ Աֆրիկայում և Լատինական Ամերիկայում:
Ողջ աշխարհում թոքերի քաղցկեղը չարորակ նորագոյացությունների հետևանքով մահվան ամենահաճախակի պատճառներից է ինչպես տղամարդկանց, այնպես էլ կանանց մոտ:
Այսօր այդ հիվանդությունից մահացությունը կազմում է հիվանդների թվի 85 տոկոսը: Գլխավոր պատճառը հիվանդությունն ուշ փուլում բացահայտելն է:
Մասնագետների խոսքով՝ ուռուցքաբանական հիվանդությունների կանխարգելումն ավելի հեշտ է, քան դրանց բուժումը: Ինչպես նշում են հայ բժիշկները, պետք է ընդամենն ազատվել վնասակար սովորույթից, կամք դրսևորել և թողնել ծխելը, չէ՞ որ այդ հիվանդության դեպքերի ճնշող մեծամասնությունն անմիջականորեն կապված է ծխելու հետ:
