ԵՐԵՎԱՆ, 25 նոյեմբերի — Sputnik. Թուրքական լոլիկը ներմուծվել և վաճառվում է հայկական շուկայում, իսկ հայ գյուղացին իր աճեցրած լոլիկը չի կարողանում վաճառել: Այսօր նման ահազանգ է հնչեցրել «Ջերմատնային ասոցիացիա» ՀԿ գործադիր տնօրեն Պողոս Գևորգյանը:
Նրա խոսքով՝ Թուրքիայից ապօրինի ներմուծվող բանջարեղենի պատճառով հայ գյուղացիներն ու գյուղմթերք արտադրողները մեծ վնասներ են կրում:
«Ներմուծման համար սահմանին տուրքի գին կա նախատեսված` 507 դրամ, բայց շուկայում թուրքական լոլիկը վաճառվում է 1 կգ-ը՝ 500 դրամով»,- ասում է Պողոսյանը՝ կասկածելով, որ ներմուծողներն, իրականում, ներկրված բանջարեղենի դիմաց մաքսատուրք են վճարել:
«Եթե տուրք վճարեն, անհամեմատ թանկ կլինի շուկայում այդ լոլիկի գինը: Թուրքականը վաճառվում է տեղականից ցածր գնով, տեղական լոլիկի սպառման գինն այս պահի դրությամբ 600 դրամից պակաս չէ: Եթե դրանից պակաս լինի՝ ֆերմերները վնասով կաշխատեն»:
Հայաստանի արդյունաբերողների և գործարարների միության անդամ Գագիկ Բաբախանյանը, որը գյուղատնտեսությամբ է զբաղվում, նշեց, որ սեփական փորձով է զգացել ոլորտի անարդարությունը:
«Հայ ֆերմերը ջերմոցներում թանկ գազ օգտագործելով, տանջանքով, չարչարանքով, վարկային ծանր պարտավորությունների տակ բարձր ինքնարժեքով լոլիկ կամ վարունգ է արտադրում, սպասում, որ տանի շուկա, մի երկու կոպեկ գումար վաստակի, դրանով փակի վարկերը ու հանկարծ Թուրքիայից բերում լցնում են շուկան ու ստացվում է անհավասար պայման»,-նշեց Բաբախանյանը:
Հայ ֆերմերները նաև համոզված են՝ թուրքական լոլիկը վնաս է հայ սպառողի առողջության համար և առաջարկում են լաբորատոր հետազոտության ենթարկել տեղական ու թուրքական արտադրանքը՝ պարզելու համար, թե ինչպես է Թուրքիայից Հայաստան հասած լոլիկը պահպանում իր թարմ տեսքը:
