«Հրապարակ». կառավարությունը կշարունակի վերադասավորվել
«Հրապարակ» թերթի տեղեկություններով՝ կադրային վերադասավորումները կառավարությունում դեռ չեն ավարտվել: Ըստ թերթի՝ նախապես ծրագրված են եղել մի շարք փոփոխություններ, որոնք դեռևս կյանքի չեն կոչվել: Այսպես. Արմեն Գևորգյանը պետք է դառնար ոչ թե նախագահի աշխատակազմի ղեկավար, այլ՝ փոխվարչապետ, իսկ փոխվարչապետ Վաչե Գաբրիելյանը` Վերահսկիչ պալատի ղեկավար, ՎՊ նախագահ Իշխան Զաքարյանը` Քաթարում դեսպան: Սակայն Վաչե Գաբրիելյանը կտրուկ դեմ է եղել իր ՎՊ տեղափոխվելուն:
Ըստ թերթի՝ 6 ամիս հետո Կարեն Կարապետյանը կրկին փոփոխությունների կգնա` ազատվելով հին կադրերից, այդ թվում՝ Էդվարդ Նալբանդյան, Արտեմ Ասատրյան, Հրանուշ Հակոբյան եռյակից՝ խաղի մեջ մտցնելով նոր դեմքերի:
«Նախարարական աթոռը կթողնի նաև Արփինե Հովհաննիսյանը՝ դառնալով պատգամավոր` ԱԺ պետաիրավական հարցերի մշտական հանձնաժողովի նախագահի ակնկալիքներով, իսկ նրա հոգևոր «հայր» Դավիթ Հարությունյանի սպասումներն առնչվում են ԱԺ փոխնախագահի «պորտֆելին»,- գրում է թերթը:
«Հրապարակ». ՊԵԿ-ը՝ «Наш дом — Газпром» կարգախոսով
Թերթը նաև գրում է, որ պետեկամուտների կոմիտեում կադրային փոփոխությունները շարունակվում են: Պաշտոններից ազատվել են օպերատիվ հետախուզության և ֆինանսահաշվային վարչությունների պետերը:
«ՊԵԿ-ում ակնկալում են հերթական «գազավիկների» մուտքը հարկային, որտեղ կատակում են, թե ՌԴ նախկին վարչապետ, երջանկահիշատակ Վիկտոր Չեռնոմիրդինի օրինակով Կարեն Կարապետյանը և իր թիմը ձևավորում են նոր կուսակցություն՝ «Наш дом — Газпром»,- գրում է թերթը:
Ըստ թերթի, հարկայինում նեղսրտած են նաև այն բանից, որ ՊԵԿ նորանշանակ նախագահն իրենց չի թողնում գումար աշխատել։ «Նրանք կարծում են, որ մաքսայինում շարունակում են աշխատել, իսկ իրենք զրկված են դրանից»,- գրում է թերթը:
«Փաստ». Սեյրան Օհանյանը «գցեց» Դալլաքյանին
«Փաստ» օրաթերթը հայտնում է, որ Վիկտոր Դալլաքյանի կուսակցության` նոյեմբերին կայանալիք համագումարը հետաձգվել է: Հարցն այն է, որ Սեյրան Օհանյանն արդեն լուծել է իր խնդիրներն իշխանությունների հետ և ՀՀԿ ցուցակով կդառնա պատգամավոր կամ էլ գործադիրում պաշտոն կստանա:
«Վիկտոր Դալլաքյանը, որին քաղաքական առաջընթացի հույսեր էր ներշնչել հենց Օհանյանը, փաստորեն, հայտնվեց «քցվածի» կարգավիճակում: Սակայն պաշտպանության նախկին նախարարը որոշել է Դալլաքյանին լրիվ «անտեր» չթողնել»,-գրում է թերթը:
«Փաստի» տեղեկություններով` Սեյրան Օհանյանն իր մտերիմ գեներալներից մեկին, որն իր հետ աշխատել է ՊՆ-ում և ծագումով Արմավիրի մարզից է, հորդորել է կուսակցություն բացելու և խորհրդարանական ընտրություններին մասնակցելու դեպքում այդ մարզում ֆինանսավորել Դալլաքյանի ընտրական շտաբները:
«Ժամանակ». Արգամիչը ձգտում է վերադառնալ ԱԺ
«Ժամանակ» թերթի համոզմամբ, 2017 թվականի ԱԺ ընտրւթյուններում ՀՀԿ-ի ներսում կարևոր ինտրիգներից մեկը կապված է Հովիկ Աբրահամյանի հետ:
Ըստ թերթի՝ Սերժ Սարգսյանը նախկին վարչապետի վերաբերյալ որոշում դեռևս չունի:
ՀՀԿ ԳՄ անդամ մի քանի գործիչների հայտնի է դարձել, որ Հովիկ Աբրահամյանը ցանկանում է ԱԺ ընտրություններից հետո գլխավորել խորհրդարանը:
«Նա վստահ է, որ եթե արտահերթ զարգացումներ չլինեն, 2018-ին հենց նա կարող է սահուն և անցնցում վարչապետի աթոռը փոխանցել նախագահի պաշտոնավարման ժամկետն ավարտած Սերժ Սարգսյանին: Արգամիչը հույս ունի ՀՀԿ նախընտրական ցուցակում զբաղեցնել առաջին երեք հորիզոնականներից մեկը, հավանաբար՝ երրորդը՝ Սերժ Սարգսյանից և Կարեն Կարապետյանից հետո»,- գրում է թերթը և հավելում.
«Եթե Աբրահամյանին հաջողվի «ամրագրել» ԱԺ նախագահի պաշտոնը, նա որոշել է ԱԺ փոխնախագահի պաշտոնում առաջարկել Արփինե Հովհաննիսյանին»:
