ԵՐԵՎԱՆ, 10 Նոյեմբերի — Sputnik. Դիլիջանի ուսումնական կենտրոնը ՀՀ կառավարությանն առընթեր Պետեկամուտների կոմիտեից կփոխանցվի ՀՀ ԿԱ Պետական գույքի կառավարման վարչությանը: Այս մասին կառավարության որոշման նախագիծը հինգշաբթի գործադիրի նիստում ներկայացրեց ՊԵԿ նախագահ Վարդան Հարությունյանը:
Նախագիծն ընդունվեց առանց քննարկման, ինչի արդյունքում հայտնի չդարձավ, թե ինչ է ենթադրում այս որոշումը. «թանկարժեք» կենտրոնը մնալո՞ւ է պետության հաշվեկշռում, թե՞ մասնավորեցվելու է:
Որոշման նախագծում նշվում է միայն, որ ուսումնական կենտրոնի շահագործումը ՊԵԿ-ի կողմից ներկայում աննպատակահարմար է, ուստի այն ամրացվում է Պետական գույքի կառավարման վարչությանը` հետագայում օգտագործման իրավունքով այլ անձի հանձնելու պայմանով:
Հիշեցնենք, որ 2008թ-ին մեկնարկած ուսումնական կենտրոնի շինարարությանը ՀՀ պետական բյուջեից հատկացվել է մի քանի տասնյակ միլիարդ դրամ: Ուսումնական կենտրոնի տարածքում այդ գումարի շրջանակում կառուցվել են մարզասրահներ, մարզահրապարակներ, լողավազաններ, շոգեբաղնիքներ, հյուրանոցային մասնաշենքեր ու սեմինար հանդիպումների սրահներ:
