Երևանի գեղեցիկ արտաքինի հետևում թաքնված է մայրաքաղաքի մաքրության համար մշտական պայքարը: Աղբահանության դժվարությունների և հասարակության մեջ մաքրություն պահպանելու մշակույթի ձևավորման անհրաժեշտության մասին Sputnik Արմենիային պատմեց «Սանիթեք» ընկերության վարչական մենեջեր Արա Կարապետյանը: Զրուցեց Դավիթ Գալստյանը:
-Որքա՞ն աղբ է հավաքել ընկերությունը Երևանում աշխատանքը սկսելուց ի վեր:
— «Սանիթեք» ընկերությունը միանգամից չի սկսել աշխատել Երևանի բոլոր վարչական շրջաններում: Մենք 2014թ-ի դեկտեմբերին սկսել ենք աշխատել Երևանի կենտրոնում, որից հետո` Դավթաշենում, Աջափնյակում և մյուս շրջաններում: Ինչ վերաբերում է աղբի ծավալներին, ապա վերջերս մենք հետազոտություն ենք անցկացրել՝ հասկանալու համար, թե որքան աղբ ենք հավաքում: Ստացված տվյալների համաձայն` օրվա ընթացքում մենք հավաքում ենք շուրջ 700 տոննա աղբ մայրաքաղաքի 11 վարչական շրջանից: Այսինքն` ամսական շուրջ 21000 տոննա աղբ:
Ավանի վերաբերյալ տվյալներ դեռ չկան, քանի որ մենք նոր ենք սկսել այնտեղ աղբահանության աշխատանքը:
-Ի՞նչ խնդիրներ են ծագում բնակչության հետ աղբը հավաքելու ժամանակ:
— Մենք յուրաքանչյուր հարմար առիթի դեպքում ասում ենք, որ մաքրություն պահպանելը ոչ միայն աշխատանք է, այլև մշակույթ: Քանի որ մենք հանրային ծառայություն ենք մատուցում, հետևաբար աշխատում ենք հասարակության հետ: Եթե հասարակության մեջ չձևավորվի մաքրություն պահպանելու մշակույթ, ապա անհնար է աշխատանքներ իրականցնել բարձր մակարդակով:
Հաճախ քաղաքացիները դժգոհ են գիշերային աղբահանությունից և աղբամանների տեղադրման վայրից: Սակայն մենք բազմիցս հայտարարել ենք, որ փորձում ենք լուծել այդ խնդիրները:
-Ի՞նչ սկզբունքով եք տեղադրում աղբամանները:
— Օգտվելով առիթից՝ ևս մեկ անգամ ցանկանում եմ զգուշացնել քաղաքացիներին, որ աղբամանները տեղադրվում են վարչական շրջանի որոշմամբ, ընկերությունը չի որոշում, թե որտեղ դնել դրանք: Եթե աղբամանների պակաս կա, մենք պատրաստ ենք ավելացնել քանակը, դրա համար պետք է պահանջ լինի վարչական շրջանի կողմից:
Ընդհանուր առմամբ Երևանի 11 վարչական շրջաններում տեղադրված է շուրջ 8000 աղբաման: Եվս 320-ը տեղադրվել է Ավանում, որտեղ մենք սկսել ենք աշխատել մի քանի օր առաջ: Եվս 80 հատ կավելացնենք:
-Աղբամանները հաճախ կոտրում են, այրում, օգտագործում որպես բարիկադ, ինչպես դա եղավ Բաղրամյան պողոտայում, Խորենացի փողոցում տեղի ունեցած իրադարձությունների ժամանակ: Այդ ընթացքում որքա՞ն վնաս է հասցվել ընկերությանը:
— Նման իրադարձություններ, կարելի է ասել, բավական հաճախ են տեղի ունենում: Ամեն անգամ մենք կոչ ենք անում չփչացնել մեր ունեցվածքը: Եթե աղբամաններ չլինեն, անհնար կլինի աղբը նորմալ հավաքել: Եթե դրանք կոտրված լինեն, ապա դա կանդրադառնա մայրաքաղաքի արտաքին տեսքի վրա: Ուստի ևս մեկ անգամ կոչ եմ անում չփչացնել աղբամանները:
Քանի որ քաղաքում բացակայում են տեսախցիկները, շատ դժվար է իմանալ, թե ով է հասցրել վնասը: Դժվար է հասկանալ՝ դա դիտավորյա՞լ է արվել, թե՞ ոչ, օրինակ, այրված աղբամանների դեպքում: Բայց եղել են մարդիկ, որոնք դրա համար պատիժ են կրել: Ինչ վերաբերում է վիճակագրությանը, ապա վերջին 10 տարվա ընթացքում վնասվել է 132 աղբաման:
-Ձեր կարծիքով՝ ինչո՞վ են առաջնորդվում մարդիկ, երբ գիտակցաբար փչացնում են աղբամանները: Կարելի՞ է դրա դեմ պայքարել:
— Երբեմն դա անում են մարդիկ, որոնք չեն հաշտվում աղբամանների գտնվելու վայրի հետ: Նրանք փորձում են դրանք այրել, որպեսզի ընկերությունը տեղադրի նորերն այլ վայրում; Բայց չէ՞ որ բնակիչները կարող են դիմել վարչական շրջանի ղեկավարությանը, որը կդիմի մեզ, և մենք կփոխենք աղբամանների վայրը՝ այդ տարածքում գտնելով ամենահարմար տեղը:
Կոչ եմ անում քաղաքացիներին հարցը լուծել հենց այդ կերպ:
-Կարո՞ղ է խոշոր տուգանքների կիրառումը լուծել քաղաքի մաքրության և փողոցում աղբ թափող բնակիչների խնդիրը:
— Եվս մեկ անգամ կրկնեմ, որ մաքրություն պահպանելը որոշակի մշակույթ է: Անհնար է միանգամից հասնել դրա ձևավորմանը՝ նույնիսկ տուգանքներ կիրառելով: Թեև դրանք օգնում են, ետ են պահում աղբն ամեն տեղ թափելուց: Բայց ժամանակ է անհրաժեշտ, որպեսզի մարդիկ ամաչեն քաղաքն աղտոտելուց:
Անհրաժեշտ է, որպեսզի այն մարդիկ, որոնք նկատում են, թե ինչպես են աղբ նետում ոչ աղբամանի մեջ, նկատողություն անեն մյուսներին, չէ՞ որ սա մեր քաղաքն է և մեր երկիրը: Երբ դու աղտոտում ես տարածքը, ապա դու խախտում ես մյուսների իրավունքը, պետք է, որպեսզի մարդիկ հասկանան դա:
Շատ հաճախ կարելի է տեսնել, թե ինչպես են մեքենայից դուրս նետում ծխախոտի մնացորդը: Տհաճ է խոսել այդ մասին, բայց դժբախտաբար ոչ բոլորն են դա հասկանում:
-Ինչպե՞ս է ընկերությունը նախապատրաստվել ձմռանը:
— Վստահ կարող եմ ասել, որ մենք պատրաստ ենք: Մենք արժանապատվորեն դուրս կգանք ձմռան անակնկալների դեմ պայքարից: Մենք ունենք 33 միավոր հատուկ տեխնիկա, պատրաստել ենք ավելի քան 2 տոննա աղ, շուրջ 400 մարդ պատրաստ է ձյան մաքրման աշխատանքին:
Հավելեմ, որ մեր ավտոպարկն աշխատում է օրական 24 ժամ, մեքենաներն աշխատում են՝ փոխարինելով միմյանց, իսկ ցանկացած անսարքություն միանգամից վերացվում է:
