ԵՐԵՎԱՆ, 9 նոյեմբերի — Sputnik, Գոհար Սարգսյան. Ամերիկյան հասարակությունը ցույց տվեց, որ փոփոխությունների կարիք է զգում։ Այս կարծիքն ունի քաղաքագետ Արա Պապյանը։ Նրա խոսքով`դեմոկրատ թեկնածու Հիլարի Քլինթոնը կանխատեսելի էր` երկար տարիներ լինելով պետական ապարատում։
«Ոչ այնքան քվեարկեցին Թրամփի օգտին, որքան պետական ապարատի, կայացած, լճացած հարաբերությունների դեմ»,-ասաց Պապյանը։
Ըստ նրա` Դոնալդ Թրամփի հաղթանակի գրավականը ներգաղթի դեմ ակտիվ պայքարն է։
«Թրամփը կոշտ կլինի ներքին քաղաքականության մեջ։ Ամբողջ աշխարհում տեղի է ունենում նացիոնալիզմի աճ, հասարակությունները ներգաղթի հետևանքով առաջացած խնդիրներ են տեսնում։ Թրամփն ամերիկյան ձևով ազգայնական է, նա ըստ էության խոսում է մեքսիկական և լատինաամերիկյան է միգրանտների դեմ»,-ասաց քաղաքագետը։
Ընտրություններից առաջ ԱՄՆ-ի հայ համայնքը հայտնել էր, որ չի սատարելու ո՛չ Քլինթոնին, ո՛չ էլ Թրամփին։ Արա Պապյանի կարծիքով` հայ համայնքը թեկնածուներին սատարելու հարցում ուղղորդվում է միայն մի չափորոշիչով` «ցեղասպանություն» բառն արտասանելու է, թե ոչ։
«Ցավոք սրտի հայկական համայնքի միակ հոգսը դարձել է «ցեղասպանություն» բառի արտասանումը կամ հայկական հարցի լուծումը, այդ բառի հետևից է ընկել, որը վաղուց արտասանվել է մի քանի անգամ։ 1951 թվականին Միացյալ Նահանգները ճանաչել է հայոց ցեղասպանությունը։ Կա ԱՄՆ կառավարության գրավոր հայտարարություն, որ հայերի նկատմամբ տեղի ունեցած ջարդերը ցեղասպանություն է, պաշտոնապես ուղարկվել է ՄԱԿ-ի գրասենյակ»,-ասաց քաղաքագետը։
Sputnik Արմենիայի այն հարցին, թե Թրամփն ինչ դիրքորոշում կարող է ունենալ ղարաբաղա-ադրբեջանական թեմայով, նկատի ունենալով նրա բիզնես հարաբերությունները Ադրբեջանի նախագահի հետ, քաղաքագետ պատասխանեց, որ բիզնեսը կստորադասվի պետական շահին։
«Ամերիկյան հասարակությունն անձնական հարաբերությունների, անձնական բիզնեսի վրա չի լինում, անկախ նրանից, թե Թրամփն ինչ անձնական հարաբերությունների մեջ է Ադրբեջանի հետ, կա պետական շահ, եթե հանկարծ նկատեն շահերի բախում անձնական ու պետական, ով ուզում ես եղիր, լավ չի լինի քեզ համար»,-ասաց նա։
Ինչ վերաբերում է Միացյալ Նահանգներ-Ռուսաստան հարաբերություններին, ապա, ըստ քաղաքագետի, մի հարցում նրանք կհամագործակցեն. Սիրիայի հարցում ամերիկացիները կցանկանան, որ ռուսական դերակատարությունը լինի։
