ԵՐԵՎԱՆ, 9 նոյեմբերի — Sputnik. Նախագահական ընտրարշավի ընթացքում Դոնալդ Թրամփը որոշակի գաղափարներ է արտահայտել Ռուսաստանի, Սիրիայի, Իրանի վերաբերյալ: Sputnik Արմենիայի հետ զրույցում, անդրադառնալով ԱՄՆ 45-րդ նախագահի օրոք տարածաշրջանում այդ երկրի վարած արտաքին քաղաքականության հնարավոր փոփոխություններին, նշեց պատգամավոր Թևան Պողոսյանը:
«Սիրիայի վերաբերյալ մի առաջարկ է արել, որը շատ նման է ռուսական դիրքորոշմանը, ինչը չի բացառում համագործակցությունը Բաշար ալ Ասադի հետ ՝ «Իսլամական պետության» դեմ պայքարում: Իրանի հանդեպ շատ կոշտ է հանդես եկել և ասել է` նախկին բոլոր պայմանավորվածությունները, որ ձեռք են բերվել Իրանի միջուկային ծրագրի շրջանակում, չի ընդունում և վերադառնալու է հին պատժամիջոցներին։ Իսկ, օրինակ, Թուրքիայի մասին որևէ բան չի ասել»,- ասաց Թևան Պողոսյանը:
Այս ամենը հաշվի առնելով, ըստ պատգամավորի, շատ դժվար է կանխատեսել, թե տարածաշրջանի համար ինչ փոփոխություններ են լինելու. մի բան պետք է փաստել, և այդ մասին այսօր ասել է նաև ՀՀ-ում ԱՄՆ դեսպան Ռիչարդ Միլզը` որքան էլ նախագահները փոխվեն, ամերիկյան արտաքին քաղաքականությունը կարող է նախընտրությունից փոխվել ընդամենը 20 տոկոսով. 80-ը մնալու է նույնը:
«Եվ մենք էլ գիտենք, որ ԱՄՆ-ը այն հզոր պետություններից մեկն է, որ առաջնորդվում է միայն իր սեփական շահերով, այնպես որ մեծ փոփոխություններ միանգամից որևէ կերպ չեմ պատկերացնում»,-ասաց պատգամավորը:
Այդուհանդերձ, Թևան Պողոսյանը հիշեցրեց, որ ԱՄՆ-ն մեր տարածաշրջանում ունի նավթային, ենթակառուցվածքային և ժողովրդավարության տարածման վրա հիմնված շահեր, որոնցով առաջնորդվելը կտրուկ փոփոխություններ չի ենթադրում:
Ինչ վերաբերում է ռուս-ամերիկյան հարաբերությունների մեղմացման կանխատեսումներին, Թևան Պողոսյանը դրանց ապագան պայմանավորում է ոչ այնքան ԱՄՆ 45-րդ նախագահի անձով, որքան նրան առաջադրած քաղաքական ուժի դիրքորոշմամբ:
«Դեմոկրատները միշտ ավելի կոշտ քաղաքականություն են վարել՝ հիմնված արժեքների վրա, իսկ հանրապետականները միշտ ունակ են եղել գործարքների գնալու և ավելի շահերն առաջ տանելու համար աչքերը որոշ գաղափարների վրա փակելու: Հիմա միգուցե կլինեն որոշակի բարեփոխումներ, բայց և՛ Ռուսաստանը, և՛ ԱՄՆ-ն, առաջնորդվելով իրենց սեփական շահերով, ունենալու են տարբեր ընկալումներ, մեկ օրվա մեջ որևէ բան չի փոխվելու»,- ասաց Թևան Պողոսյանը:
Ինչ վերաբերում է Հայաստանի նկատմամբ ԱՄՆ-ի առաջիկա դիրքորոշմանը, Թևան Պողոսյանը կարծիք հայտնեց, որ այն մեծապես կախված է առաջին հերթին հենց Հայաստանից, քանի որ ամերիկյան շահերը տարածաշրջանում տարածելու նպատակով ԱՄՆ-ն պետք է համագործակցի նաև Հայաստանի հետ:
«Կհամագործակցեն թույլ ՀՀ-ի հետ, կենթարկվենք ճնշումների, կհամագործակցեն ուժեղ ՀՀ-ի հետ, դա կվերածվի համագործակցության, մենք կկարողանանք մեր շահերը պաշտպանել»- ասաց նա:
Հայոց ցեղասպանության ճանաչման խնդիրը, որի մասին, ի տարբերություն նախորդ նախագահական ընտրությունների, այս անգամ ԱՄՆ-ում թեկնածուներից ոչ ոք խոստումներ չհնչեցրեց, Թևան Պողոսյանի համոզմամբ, դարձյալ կախված է լինելու Հայաստանի դիրքորոշումից ու կատարած աշխատանքից:
«Եթե կաշխատենք, ապա միգուցե ինչ-որ նոր արդիական գաղափարներ կառաջանան, իսկ եթե չենք աշխատի, ապա կունենանք օրենքի պահանջի տրադիցիոն ապրիլքսանչորսյան ինչ-որ հայտարարություն»,-ասաց Թևան Պողոսյանը՝ հավելելով, որ եթե Հայաստանն իր առջև արտաքին քաղաքական նպատակ է դրել ցեղասպանության միջազգային ճանաչումը, ապա պետք է աշխատի՝ անկախ այն հանգամանքից, թե որ երկրի հետ է աշխատանք տանում այդ ուղղությամբ:
