ԵՐԵՎԱՆ, 3 նոյեմբերի — Sputnik. Ցանկացած երկրի բանակ չի կարող լիարժեք լինել առանց կանանց։ Իսկ երբ պատերազմ է սկսվում, հատկապես կարևորվում է բուժանձնակազմի գործը։ Եվ, իհարկե, բուժաշխատողների մեծամասնությունը կանայք են։
Հայաստանի բնակչուհի Հեղինե Բդոյանը մոր ծննդյան օրը ճակատագրական որոշում է կայացրել ոչ միայն իր, այլև հարազատների համար։ 19-ամյա աղջիկը խնամում էր իր տան մոտ գտնվող Վնասվածքաբանության գիտական կենտրոնի հիվանդներին։ Նրանք հիմնականում վիրավոր զինվորներ էին, որոնք Ղարաբաղից տեղափոխվել էին Երևան։
«Հեղինեն ապրում էր Վնասվածքաբանության կենտրոնից ոչ հեռու` Նորք Մարաշում։ Ես եղել եմ նրանց տանը… Նրա հարազատներն ինձ պատմեցին, որ շատ են անհանգստացել, երբ նա կորել է։ Նրանք փնտրել են Հեղինեին ողջ Հայաստանում, բայց նրանց մտքով անգամ չի անցել, որ նա մեկնել է Ղարաբաղ», — Sputnik Արմենիային պատմեց «Մայր Հայաստան» զինվորական թանգարանի ֆոնդապահ Լիլյա Անտոնյանը։
Մոր ծննդյան օրը Հեղինեն ասել է, որ գնում է նվեր գնելու, բայց հետ չի վերադարձել։ Երեք ամիս անց հարազատներն իմացել են, որ ապաքինված զինվորների հետ նա գնացել է Ղարաբաղ։ Հենց զինվորներն են նրան պատմել, թե իրականում ինչ է տեղի ունենում առաջնագծում։
Հեղինեն Էջմիածնի կամավոր ջոկատի կազմում որպես կապավոր մասնակցել է Հադրութի շրջանի Էդիլուի ձորակում ընթացող պաշտպանական և ազատագրական մարտերին։
«Ցավոք, նա մահացել է, և Երևան են բերել միայն նրա դին», — ասաց Sputnik Արմենիայի զրուցակիցը։ 19-ամյա աղջիկը մահացել է առաջնագծում, երբ վերականգնել է հեռախոսակապի վնասված գիծը։ Հեղինեին թաղել են Երևանում։
Անտոնյանը մեզ պատմեց նաև այլ խիզախ կանանց մասին, որոնք ղարաբաղյան պատերազմի տարիներին ռազմաճակատ են մեկնել։
Նրանց լուսանկարները զարդարում են «Մայր Հայաստան» զինվորական թանգարանի պատը։ Նա նշեց, որ պատերազմի ժամանակ, երբ անընդհատ բերել են վիրավորներին և զոհվածերին, բոլորը բարոյական աջակցության կարիք են ունեցել։ Իսկ կին բուժաշխատողները, իհարկե, աչքի են ընկել հոգատարությամբ և ուշադրությամբ։
