ԵՐԵՎԱՆ, 26 հոկտեմբերի-Sputnik. Աշխարհի 25 երկրից Հայաստան են ժամանել ոսկեգործության հսկաները, այլ կերպ ասած, ամբողջ աշխարհում ոլորտով հետաքրքրվածների հայացքները սևեռված են Հայաստանի վրա։ Մեկ հարկի ներքո հավաքվելու նպատակը մեկն է`ՍԻԲՋՈ համաժողովին մասնակցելը։ Այն ամեն տարի տեղի է ունենում մի երկրում. 2014 թվականին Ռուսաստանում էր, իսկ նախորդ տարի` Բրազիլիայում։
Համաժողովի պաշտոնական մեկնարկին ներկա էր նաև հանրապետության նախագահ Սերժ Սարգսյանը։ Նա ողջունեց ներկաներին ու հայտնեց, որ Հայաստանը մեծ նշանակություն է տալիս այս համաժողովի անցկացմանը։
Նա ներկաներին տեղեկացրեց, որ Հայաստանում ոսկեգործության և ադամանդագործության զարգացման ուղղությամբ ակտիվ աշխատանքներ են տարվում։ Այդ ճյուղը հայտարարվել է մեր երկրի տնտեսության գերակա, ռազմավարական ուղղություններից մեկը։
«Հայաստանն ու հայ ժողովուրդը մեծ ավանդ են ներդրել ոսկերչության և ակնագործության զարգացման գործում, իրենց հաստատուն տեղն ունեն այս ոլորտի տարեգրության մեջ։ Հայ ոսկերիչների` հաջողությամբ ստեղծած գործերը, նրանց գործունեությունը տարբեր երկրներում զարգացրել է ոլորտը։ Նրանք հիմնել են ոսկերչական ձեռնարկություններ և վաճառատներ Նյու-Յորքում և Լոնդոնում, Մոսկվայում, Կահիրեում և բազմաթիվ այլ վայրերում»,-ասաց նախագահը։
Նա արտասահմանցի հյուրերին ներկայացրեց, որ Երևանում կա Ոսկերիչների փողոց, որը տանում է դեպի «Մերիդիան» ոսկերչական տնտեսական գոտի։ Դա հսկայական ցուցահանդեսային կենտրոն է, որը ղեկավարում է նրա խորհրդականը` Գագիկ Գևորգյանը։ Վերջինս ցավով նշեց, որ հայ փայլուն ոսկերիչներն ապրում և աշխատում են արտերկրում։
«Հայաստանի պոտենցիալը մեծ է, քանի որ հայ ոսկերիչներն աշխարհում լավագույններից են, եթե չասեմ` լավագույնը։ Ցավոք սրտի, մեծ մասը դրսում են։ Պետք է կարողանանք մեր հայ ոսկերիչներին տարբեր երկրներից բերենք, այստեղ հիմնեն իրենց արտադրությունը, բիզնեսը, մթնոլորտ ստեղծենք։ Գիտեք` բիզնեսը գնում է այնտեղ, որտեղ խաղաղություն է, որտեղ տրամադրություն ու վստահություն կա։ Բոլոր պայմաններն այսօր ստեղծում է երկրի ղեկավարությունը»,-ասաց Գևորգյանը։
Որպես ասվածի հավաստիացում, նա հիշեցրեց, որ պատահական չէ նման միջոցառումների անցկացումը հենց «Մերիդիան» կենտրոնում։ Այստեղ ցանկացած գործարար կարող է գալ, հիմնել ոսկերչական արտադրություն, ներդրումներ անել, ստեղծել աշխատատեղեր և, միաժամանակ, ազատվել հարկերից։
Համաժողովի մասին խոսեց ՍԻԲՋՈ-ի նախագահ Գայետանո Կավալիերին։
«Մենք աշխատում ենք ավելի քան 41 անդամ-երկրների հետ։ Ունենք տվյալներ, որ Հայաստանում կան ոսկերչության հնագույն ավանդույթներ։ Պետք է մշակենք մասնագիտական գիծ համագործակցելու համար։ Հիմնական հարցերը բաժանված են երկու մասի. տեխնիկան հարցեր` հղկում, կտրում, արտադրություն, հետո կորպորատիվ հարցեր` տարածում, վաճառք»,-ասաց նա։
Տեղեկացնենք, որ 1926 թվականին եվրոպական մի քանի երկրների ներկայացուցիչներ որոշեցին ստեղծել կազմակերպություն, որը կներկայացնի ոսկերչական իրերի առևտրի շահերը։ 1961 թվականին կազմակերպությունը կոչվեց ՍԻԲՋՈ(ֆրանսերեն` Confédération internationale de la bijouterie, joaillerie, orfèvrerie):
ՍԻԲՋՈ-ն միակ կազմակերպությունն է, որն ունի ՄԱԿ-ի Տնտեսական ու սոցիալական խորհրդի խորհրդատուի կարգավիճակ աշխարհի ոսկերչական ոլորտի հարցերով։
