ԵՐԵՎԱՆ, 15 հոկտեմբերի — Sputnik. Բեսլանի մոտ նախօրեին տեղի ունեցած ավտոբուսի վթարի հետևանքով ծանր վնասվածքներ ստացած Հայաստանի 4 քաղաքացիների երեկ երեկոյան հնարավոր չի եղել տեղափոխել Հայաստան: Նրանք դեռևս շարունակում են բուժում ստանալ Վլադիկավկազի հիվանդանոցում։ Այս մասին լրագրողներին հայտնեց ԱԻՆ փրկարար ծառայության գնդապետ Արման Ցոլակյանը։
Նա ասաց, որ Վլադիկավկազի հիվանդանոցում են գտնվում 1949թ-ին ծնված Ժասմինա Հարությունյանը, 1990թ-ին ծնված Սմբատ Պողոսյանը, 1949թ-ին ծնված Հրանտ Բաղդասարյանը և 1984թ-ին ծնված Ավագ Ծատինյանը:
Ավտոբուսի վթարից տուժած մյուս ուղևորները, որոնց վիճակը համեմատաբար ավելի լավ էր, երեկ երեկոյան ՌԴ ԱԻՆ-ի ինքնաթիռով վերադարձել են Հայաստան:
Երեկ երեկոյան Հայաստան է տեղափոխվել նաև ավտոբուսի վթարից զոհված վարորդի՝ 62-ամյա Յուրիկ Պողոսյանի դին:
«Երևան ժամանածներից 11 քաղաքացի տեղափոխվել է Գրիգոր Լուսավորիչ բժշկական կենտրոն, որոնցից 10-ն արդեն դուրս է գրվել, իսկ 1934թ-ին ծնված Վարյա Գևորգյանը շարունակում է բուժումը: Վնասվածքները միջին ծանրության են, բայց, հաշվի առնելով տարիքը, բուժումը դեռ կշարունակվի այնքան, մինչև վերջնական ապաքինվի»,- ասաց Ցոլակյանը:
Անդրադառնալով ավտոբուսի տեխնիկական վիճակի, վարորդի առողջական վիճակի և նրա քնած լինել-չլինելու մասին հարցերին` Ցոլակյանը նշեց, որ այդ հարցերն առայժմ հստակ պատասխան չունեն և պարզ կլինեն միայն վթարի առիթով ՌԴ-ում հարուցված քրեական գործի նախաքննության արդյունքում:
Իսկ առայժմ հայտնի է միայն, որ վթարված «Մերսեդես» մակնիշի ավտոբուսը պատկանել է Արմեն Պողոսյանին և գործում էր մասնավոր հիմունքներով: Ավտոբուսի սեփականատերը, ԱԻՆ ներկայացուցչի տեղեկություններով, վարորդի որդի Արեն Պողոսյանն է:
Հոկտեմբերի 14-ի վաղ առավոտյան` Ռուսաստանի ժամանակով ժամը 06:40-ին, ՌԴ Հյուսիսային Օսեթիայի ճգնաժամային կառավարման կենտրոնից ՀՀ ԱԻՆ ճգնաժամային կառավարման կենտրոն ահազանգ էր ստացվել Վլադիկավկազ-Բեսլան ավտոճանապարհին հայկական պետհամարանիշով ավտոբուսի վթարի մասին: Ավտոբուսը, նախնական տվյալներով, բախվել է ճամփեզրին կայանված ավտոքարշակին:
Ըստ Ցոլակյանի` ավտոբոսի 51 ուղևորներից 8-ը ՌԴ քաղաքացիներ են եղել։ Վթարի հետևանքով 5 ուղևոր զոհվել է, 27-ը՝ վիրավորվել: Զոհերից 3-ը ՌԴ քաղաքացիներ են՝ ազգությամբ ռուս, 1-ը՝ Հունանյան Արևիկը՝ ազգությամբ հայ, ՌԴ քաղաքացի է, իսկ Յուրա Պողոսյանը՝ ավտոբուսի վարորդը՝ ՀՀ քաղաքացի:
