ԵՐԵՎԱՆ, 14 հոկտեմբերի — Sputnik. ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը «Զվարթնոց» օդանավակայանում հայտնեց, որ նախնական տեղեկություններով` վթարի պահին վարորդը քնած է եղել։
«Բայց դա նախնական տեղեկություն է»,- կրկնեց նա։
Sputnik Արմենիայի հարցին` երբ մեքենան դուրս է գալիս երկար երթևեկության, համապատասխան տեխզննում անցնու՞մ է, նախարարը պատասխանեց` եթե լիցենզավորված է, ուրեմն անցնում է։
«Պատճառը վերջնական չէ, քննությունը ցույց կտա, բայց բոլորս հասկանում ենք, որ նման դեպք պատահել է վարորդի քնելու պատճառով։ Մեքենայի անսարքություն կարծես թե չկա։ Լիցենզավորման դեպքում մեքենաները ստուգվում են։ Չգիտենք` լիցենզավորված է, թե ոչ, քննությունը ցույց կտա»,-ասաց Մարտիրոսյանը։
Նախարարը տեղեկացրեց, որ օրենքի փոփոխություն է ներկայացվել Ազգային ժողով բոլորին օրինական դաշտ բերելու համար։
«Իմ հիմնական խնդիրներից է, որ օրենքը շուտ ընդունվի, վերահսկողություն իրականացվի ոչ միայն նման ուղևորափոխադրումներում, այլև` տեղական դաշտում` տաքսիներին վերաբերող։ Այս հարցում ձեր օգնության կարիքն էլ կունենամ։ Ինձ թվում է` ոչ մեկը դեմ չի լինի, որ մի քիչ խստացվի»,- ասաց նախարարը։
Նախարարն ավելացրեց, որ տուժածների ընտանիքները հավանաբար փոխհատուցում կստանան։
«Հանձնաժողովի ղեկավարը ես եմ, ամեն ինչ կանեմ, որ փոխհատուցվի»,-ասաց նա։
Նշենք, որ վթարը տեղի է ունեցել Բեսլանի մոտ, 04:30-ին։ Մոսկվա-Երևան երթուղի իրականացնող ուղևորատար ավտոբուսը բախվել է ճամփեզրին կայանած բեռնատարին։ Ավտոբուսում 52 մարդ է եղել, գրեթե բոլորը` Հայաստանի քաղաքացիներ։
