ԵՐԵՎԱՆ, 13 հոկտեմբերի — Sputik. «Հայկական վերածնունդ» և «Բարգավաճ Հայաստան» կուսակցությունները դիմել են ՀՀ վարչական դատարան` բողոքարկելով Գյումրու ավագանու և, մասնավորպես, քաղաքապետի ընտրությունների արդյունքները:
Դիմումատուները պահանջում են անվավեր ճանաչել և վերաբաշխել Գյումրու ՏԻՄ ընտրությունների արդյունքում քաղաքական ուժերին տրված մանդատները:
Այսօր կայացած դատական նիստում հայտատուները հրապարակել են դատաքննության ընթացքում ի հայտ եկած նոր իրողություն: Պարզվել է, որ հանձնաժողովը խախտել է գործող ԸՕ 144-րդ հոդվածը: Հենց այս հոդվածի հիման վրա է, որ Գյումրու ընտրություններում առաջին տեղը գրաված «Բալասանյան դաշինքի» ստացած մանդատներն ավելացել են երկուսով` հասնելով բացարձակ մեծամասնության: Սակայն, ինչպես այսօր դատարանում հայտարարեց հայցվոր կողմը, օրենսգրքի «անցումային դրույթներ» հատվածում սահմանված է, որ օրենքի այդ դրույթը, որով հանձնաժողովը մանդատների բաշխում է կատարել, առայժմ օրինական ուժ չունի և ուժի մեջ է մտնելու միայն 2017թ-ի սեպտեմբերին:
«Փաստորեն կիրառվել է մի դրույթ, որը ուժի մեջ է մտնելու միայն մեկ տարի հետո,- դատական նիստի ընդմիջմանը լրագրողների հետ զրույցում հայտարարեց «Հայկական վերածնունդ» կուսակցության ներկայացուցիչ Հովհաննես Մարգարյանը։- Սա էր, որ մենք լրացուցիչ հանձնեցինք դատարանին և հնարավորություն ընձեռեցինք, որ ինքը որոշում կայացնի»:
Հիշեցնենք, որ «Բալասանյան դաշինքը» ընտրությունների արդյունքում ստացել էր 15 մանդատ, ԲՀԿ-ն` 9, ԳԱԼԱ-ն` 5, «Հայկական վերածնունդ»-ը` 4: Հանձնաժողովի որոշմամբ` «Բալասանյան դաշինքի» մանդատներին ավելացվել էին ևս երկուսը, ինչի արդյունքում, որպես ձայների բացարձակ մեծամասնությամբ ընտրված քաղաքական ուժ, վերջինը քաղաքապետ էր հռչակել իր ընտրացուցակի առաջին հորիզոնականը զբաղեցնող Գյումրու գործող քաղաքապետ Սամվել Բալասանյանին:
Ժամը 18:00-ին Վարչական դատարանում մեկնարկած նիստը դեռ շարունակվում է: Դատավճիռը կհարապարկվի հոկտեմբերի 18-ին` ժամը 13:00-ին։
