ԵՐԵՎԱՆ, 10 հոկտեմբերի — Sputnik, Արմենուհի Մխոյան. Գյումրու ավագանու նիստի արդյունքով` հայրաքաղաքն առաջիկա 5 տարվա ընթացքում կրկին կղեկավարի Սամվել Բալասանյանը։
Ավագանու առավելագույն` 17 մանդատ ստացած քաղաքական ուժի՝ «Բալասանյան» դաշինիքի` ավագանիների ցուցակը գլխավորող անդամը՝ Սամվել Բալասանյանը, հայտարարվեց քաղաքապետ և ստացավ քաղաքի խորհրդանշական բանալին ու քաղաքի զինանշանով լանջաշղթան:
Սամվել Բալասանյանը ձեռքը դրեց ՀՀ Սահմանադրության վրա ու հանդիսավորությամբ երդվեց. «Գյումրու քաղաքապետի պաշտոնավարման ընթացքում օրենքով ամրագրված լիազորություններն իրականացնել ազնվորեն և բարեխղճորեն՝ որդեգրելով թափանցիկ աշխատաոճ: Անշեղորեն պահպանել ՀՀ սահմանադրությունն ու օրենքները, Գյումրի քաղաքի ավագանու որոշումները, մարդու և քաղաքացու իրավունքներն ու ազատությունները անվերապահորեն ծառայել Գյումրիի զարգացմանն ու բարգավաճմանը, գործել ի շահ քաղաքի և ի բարօրություն բնակիչների»:
Ի դեպ, ավագանու անդրանիկ նիստին այդպես էլ դատարկ մնացին ավագանու մյուս 16 անդամների աթոռները. նրանք նախապես հայտարարել էին, որ որպես բողոքի նշան՝ ավագանու անդամների մանդատների բաշխման հետ կապված բոյկոտելու են ավագանու նիստերը և չեն ներկայանալու այդ նիստերին: Այս երեք ուժերը հնարավորություն ունեն թիվ 34 ԸԸՀ-ի կայացրած որոշումը բողոքարկելու վարչական դատարանում՝ որոշման հրապարակման պահից (հոկտեմբերի 9) հետո 3 օրվա ընթացքում:
Ավագանու մյուս անդամներն իրենց օրը սկսեցին ուրախ տրամադրությամբ, փողային նվագախմբի երաժշտության ու շնորհավորանքների ներքո, իսկ Սամվել Բալասանյանն իր թիմակից ավագանիների հետ նիստից անմիջապես հետո այցելեց Շիրակի թեմի առաջնորդին՝ թեմակալ առաջնորդի օրհնությունը ստանալու:
