ԵՐԵՎԱՆ, 13 հոկտեմբերի — Sputnik. Լևոն Ալթունյանն ասաց, որ ինքն ավելի հարուստ է, քան բժիշկները և ավելի աղքատ, քան հարուստները։ Իսկ Մոսկվայում բնակարան ունենալու և այն վաճառելու հարցին ի պատասխան Լևոն Ալթունյանն ասաց, թե ինքն այնտեղ բնակարան չի ունեցել։
«Ես Մոսկվայում բնակարան չունեի, նման բան չեմ ասել, ասել եմ` Մոսկվայի ցանկացած բնակիչ, եթե բնակարան վաճառի, հարուստ կլինի, ես էլ, եթե Երևանում բնակարան վաճառեմ, հարուստ կլինեմ»,-ասաց նախարարը։
Հիշեցնենք, որ 2 շաբաթ առաջ լրատվամիջոցների այն հարցին, թե խոսակցություններ են պտտվում, որ առողջապահության նորանշանակ նախարարը միլիոնատեր է, Ալթունյանը դրական պատասխան տվեց։
«Մոսկվայի ցանկացած բնակիչ, եթե վաճառի իր բնակարանը, միլիոնատեր կդառնա, այդ թվում նաև ես»,-ասել էր նախարարը։
Այն հարցին էլ, թե ինչպես պետք է վերացվի համակարգի կաշառակերությունն ու կոռուպցիան, նախարարը քաղաքացիներին նախ հորդորեց նվերներ չանել։
«Որպեսզի բժիշկները չպահանջեն, պետք է աշխատավարձերը բարձրացնենք, արդյունավետությունը բարձրացնենք, քաղաքացիներին կրթենք, որ չպետք է բժիշկներին մոտենալ նման հարցերով»,-ասաց Ալթունյանը։
Նա նաև չթաքցրեց, որ իր բժշկական պրակտիկայում ստացել է նվեր` կոնյակի տեսքով, ու ընդունել է այն։
