ԵՐԵՎԱՆ, 12 հոկտեմբերի — Sputnik. ԲՀԿ-ն «Լուսավոր Հայաստանին» ներկայացրել է փաստեր` ապացուցելով, որ Վանաձորի քաղաքապետի ընտրություններում իրենք «մաքուր են» և ըստ պայմանավորվածության` քվեարկել են «Լուսավոր Հայաստան» կուսակցության թեկնածու Քրիստ Մարուքյանի օգտին: Այս մասին այսօր լրագրողներին ասաց ԱԺ ԲՀԿ խմբակցության քարտուղար Վահե Էնֆիաջյանը:
«Պայմանավորվել էին` ինչպես ծալել քվեաթերթիկները և «պտիչկան» ինչպես դնել, որ մի քիչ կլոր ստացվեր ու անկյունից դուրս գար: Եթե մյուս ուժերն էլ են ասում, որ կա սկզբունք, ապա ո՞րն է պատճառը, որ չեն հրապարակում երկու քաղաքական ուժերը, թե որն է եղել իրենց սկզբունքը»,- ասաց նա:
Իսկ մինչ քաղաքական ուժերը շարունակում են իրենց մեջ փնտրել դավաճանին, ԲՀԿ-ական պատգամավորը չի թաքցնում, որ վանաձորցիները հիասթափված են թե՛ քաղաքապետից, թե՛ ընտրություններից:
«Անկախ նրանից, թե որ քաղաքական ուժից կլինի պայմանավորվածությունը խախտողը, վանաձորցիների հակակրանքն արդեն շատ մեծ է. քաղաքական ուժերից առավել ժողովուրդն է գնահատական տալու, թե ով է իրականում եղել դավաճանը»,- լրագրողների հարցին ի պատասխան` ասաց Վահե Էնֆիաջյանը:
Հոկտեմբերի 10-ին Վանաձորի նորընտիր ավագանին փակ, գաղտնի քվեարկությամբ 33 ձայնից 19-ով քաղաքապետ ընտրեց ՀՀԿ-ի թեկնածու Մամիկոն Ասլանյանին: Նրա մրցակից, «Լուսավոր Հայաստանի» ներկայացուցիչ Քրիստ Մարուքյանը ստացավ 14 ձայն, այն դեպքում, երբ ՀՀԿ-ն և ՀՅԴ-ն միասին ունեին`15 ձայն, ընդդիմությունը` 18 քվե, որից «Լուսավոր Հայաստանը»` 10, «Հայկական Վերածնունդը»` 5, «Բարգավաճ Հայաստանը»` 3: Ընդ որում` ընդդիմադիր երեք ուժերը հուշագիր էին ստորագրել, որ պաշտպանելու են «Լուսավոր Հայաստանի» ցուցակը գլխավորող Քրիստ Մարուքյանի թեկնածությունը:
