ԵՐԵՎԱՆ, 12 հոկտեմբերի — Sputnik. Ռուս-թուրքական հարաբերությունների ջերմացումը չի անդրադառնա Հարավային Կովկասում Թուրքիայի քաղաքականության վրա, Sputnik Արմենիային ասաց Ռազմավարական զարգացման մոդելավորման կենտրոնի առաջին փոխնախագահ, քաղաքագետ Գրիգորի Տրոֆիմչուկը։
«Հայ-թուրքական հարաբերությունների խնդիրը միանգամայն այլ հարց է, այն չի կարելի դիտարկել Մոսկվայի և Անկարայի հարաբերությունների համատեքստում», — ասաց Տրոֆիմչուկը։ Նրա խոսքով` Հարավային Կովկասում Թուրքիան իր նախագծերն ունի, դրանք մեծամասամբ համաձայնեցվում են ԱՄՆ-ի նախագծերի հետ, այդ թվում` Սիրիայում և Մերձավոր Արևելքում, թեև նա փորձում է իր գիծը տանել։
Քաղաքագետի կարծիքով` Թուրքիայում պետական հեղաշրջման ճնշումից, ինչպես նաև Ադրբեջանի մի շարք քայլերից հետո առկա իշխանության ամրապնդման համար Անկարան և Բաքուն իրենց զգալիորեն ավելի լավ և ուժեղ են զգում, և նրանց կապերն արագ կզարգանան։
«Հետևաբար Հայաստանն այս իրավիճակում չի կարող որևէ բարելավման հույս ունենալ։ Նրա համար, ընդհանուր առմամբ, եթե վերցնենք այդ համատեքստը, իրավիճակը վատթարանում է», — ասաց Տրոֆիմչուկը։
Այս պայմաններում, նրա խոսքով, Հայաստանը պետք է ուշադիր հետևի տարածաշրջանում իրավիճակի զարգացմանը։ Քաղաքագետը նշում է, որ թեև ՀԱՊԿ-ում մասնակցությունը Հայաստանի համար լավ պատվար է, սակայն գործընկերներին ուղղված որոշակի հարցեր այդպես էլ օդից կախված են մնում։
