ԵՐԵՎԱՆ, 12 հոկտեմբերի — Sputnik. Վանաձորում եւ Գյումրիում անցկացրած ՏԻՄ ընտրությունն անցել է ազատ եւ թափանցիկ: Այսօր այդ մասին ասաց ԱԺ ՀՀԿ խմբակցության քարտուղար Գագիկ Մելիքյանը:
Ինչ վերաբերում է ընդդիմության հայտարարություններին` իշխանությունների կողմից ընդդիմադիր գործիչների նկատմամբ կիրառված ճնշումների մասին, ՀՀԿ ներկայացուցիչը հերքեց դրանք, միաժամանակ, ընդդիմադիր ուժերին մեղադրելով ոչ ճիշտ քաղաքականուոյւն վարելու մեջ:
«Ընդդիմադիր քաղաքական ուժերը մրոտելու քաղաքականություն են վարում, գաղափարական, կառուցողական ընդդիմադիր ուժեր չունենք»,-ասաց նա` ընդդիմադիրներին խորհուրդ տալով կատարվածի պատճառն իրենց մեջ փնտրել:
Գագիկ Մելիքյանը համոզմունք հայտնեց, որ «Լուսավոր Հայաստան»-ի, ԲՀԿ-ի եւ «Հայկական վերածնունդ» կուսակցության ձևավորած դաշինքն ի սկզբանե մեռելածին էր:
««Լուսավոր Հայաստանը» փորձեց դաշինք ձեւավորել, սակայն, քաղաքական հենք չունեցող դաշինքները չեն կարող երկար գոյատեւել»,- ասաց բանախոսը:
Անդրադառնալով ընդդիմադիրների շարքերում դավաճանների մասին հայտարարություններին, Գագիկ Մելիքյանը նշեց, որ կատարվածի մեջ ենթատեքստ փնտրելու կարիք չկա. ով ավելի լավ ծրագրեր ուներ` նրան էլ ձայն տվեցին:
