ԵՐԵՎԱՆ, 11 հոկտեմբերի — Sputnik, Արմենուհի Մխոյան. «Հայկական վերածնունդ» և «Բարգավաճ Հայաստան» կուսակցությունները չեն պատրաստվում կանգ առնել և իրենց մանդատների համար պատրաստվում են դիմել նաև Սահմանադրական դատարան, եթե վարչական դատարանը չբավարարի նրանց հայցը։
Գյումրու թիվ 34 ընտրատարածքային ընտրական հանձնաժողովի որոշման համաձայն և հիմք ընդունելով ՀՀ ընտրական օրենսգրքի 141 հոդվածի 5-րդ կետը` «Բալասանյան» դաշինքին «նվիրվեց» 2 մանդատ (15 մանդատին գումարվեց ևս 2-ը) ու ստացվեց 17 մանդատ, «Բարգավաճ Հայաստան» կուսակցությանը 9 մանդատի փոխարեն տրվեց 8-ը, «Հայկական վերածնունդը» կուսակցության 5 մանդատը նվազեց 1-ով, իսկ «ԳԱԼԱ» կուսակցության 4 մանդատների թիվն անփոփոխ մնաց:
Այս որոշումն ուժի մեջ էր մտել որոշման հրապարակվելուց հետո՝ հոկտեմբերի 9-ից: Որոշումը կարող էր բողոքարկվել ՀՀ վարչական դատարան, ինչը և արեցին կուսակցությունները: Ըստ այդմ` որպես հայցվոր վարչական դատարան ներկայացել էին «Բարգավաճ Հայաստան» և «Հայկական վերածնունդ» կուսակցությունները:
«Պահանջը հետևյալն է՝ անվավեր ճանաչել թիվ 34 ԸԸՀ-ի` հոկտեմբերի 9-ի թիվ 2006 Ա որոշումը և վերանայել մանդատների թիվը: Հուսով ենք, որ վարչական դատարանը մեր հայցը կբավարարի, կկասեցնի թիվ 34 ԸԸՀ-ի կայացրած որոշումը, և կգնանք դեպի քաղաքապետի նոր ընտրություններ, իսկ չբավարարելու դեպքում՝ կդիմենք Սահմանադրական դատարան»,- նշեց «Հայկական Վերածնունդ» կուսակցության լիազոր ներկայացուցիչ Համլետ Սարուխանյանը:
