ԵՐԵՎԱՆ, 6 հոկտեմբերի — Sputnik. Ինչպես աշխարհում, այնպես էլ տարածաշրջանում և Հայաստանում, մարտահրավերների պակաս չկա. այս համոզմունքն ունի երկրի ղեկավար Սերժ Սարգսյանը։ Կառավարության նիստում նա ընդգծեց, որ հեշտ է հասնել տնտեսական բարձր արդյունքների, եթե ապրում ես խաղաղ պայմաններում։
«Մեր տնտեսության, ընդհանրապես հասարակության ներուժն ավելի կազմակերպված ու նպատակային աշխատանքի մեջ է։ Շատ բարդ է, երբ կան արտաքին բացասական ազդակներ, բայց դու պարտավոր ես անել առավելագույնն ու ունենալ զարգացում»,- ասաց նախագահ Սարգսյանը։
Նա հորդորեց ավելի լավ ու ռացիոնալ ծախսել պետական միջոցները։
«Իմ համոզումն ու աշխարհի փորձն է վկայում, որ հնարավոր է ավելի լավ ու ռացիոնալ կառավարել համեստ միջոցներն ու հասնել անհամեմատ լավ արդյունքների»,- ասաց նախագահը։
Նախագահ Սարգսյանը մեկ անգամ ևս շնորհավորեց կառավարության նոր կազմին պետական բարձր պաշտոններում նշանակվելու կապակցությամբ, հետո ուղղում մտցրեց` ծառայության անցնելու կապակցությամբ, ավելորդ համարեց հիշեցնել պատասխանատվության մասին։
