ԵՐԵՎԱՆ, 6 հոկտեմբերի — Sputnik. Նախագահ Սերժ Սարգսյանը ելույթ ունեցավ կառավարության այսօրվա նիստում և կառավարությանը հորդորեց անմնացորդ նվիրվել գործին։
«Ես հավատում եմ, որ այս կառավարությունը կարող է անել այն ինչ չի հաջողվել նախորդ կառավարություններին։ Ձեզ աջակցելու են, ոգևորելու են, քայլելու են նույն ուղղությամբ, բայց շինարարը պետք է լինի կառավարությունը։ Ձեր հաջողությամբ են պայմանավորված այն ակնկալիքները, որ ունի ժողովուրդը։ Իմ հորդորն է նվիրվել անմնացորդ»,- ասաց ՀՀ նախագահը` նշելով, որ շատ դժվարություններ կլինեն, բայց պետք է լինել հաստատակամ։
«Նեղանալ ու նեղսրտել չկա։ Բոլորս պիտի հասկանանք, որ անձնականը պիտի մղվի երկրորդ պլան։ Ձեր ընտանիքն ու ընկերները կհասկանան։ Մի վախեցեք նրանից, որ ձեզ կասեն`մեզ հետ քիչ եք հանդիպում։ Եղեք միասնական»,- ասաց նախագահը։
Սերժ Սարգսյանը շեշտեց, որ վարչապետը սոսկ ղեկավար չէ, այլ` թիմի առաջնորդ, և նրա կշտամբանքները անձին չեն վերաբերելու։
«Դրանք լինելու են ձեր արդյունավետությունը բարձրացնելու նպատակով։ Նայեք առաջ։ Առաջ գնալու ուղիներն է պետք գտնել»,- ասաց նախագահը` վստահեցնելով, որ միասնական աշխատանքը բերելու է հաջողության։
Սերժ Սարգսյանից հետո խոսեց ՀՀ վարչապետ Կարեն Կարապետյանը և շնորհակալություն հայտնեց վստահության համար։
«Ազդակ ենք տալու ՀՀ քաղաքացուն, որ գնում ենք ակնկալիքները բավարարելու ուղիով։ Ռեգուլյար բացատրելու ենք` ինչու ենք սա անելու, ինչ նպատակ ունենք։ Լինելու է հետադարձ կապ»,- ասաց վարչապետը։
Նախագահն իր ելույթից հետո երկու անգամ հարցրեց` հարցեր ունե՞ք։ Ոչ ոք չպատասխանեց։
«Երբ հարցեր չեն լինում, երկակի բան է առաջանում` կա՛մ ամեն ինչ հասկանալի է, կա՛մ անհասկանալի ու անընդունելի»,- ասաց նա։
Նախագահն իր ելույթից հետո հեռացավ կառավարության նիստերի դահլիճից, իսկ գործադիր մարմինը շարունակեց աշխատանքը։
