ԵՐԵՎԱՆ, 6 հոկտեմբերի — Sputnik. Ռուսաստանի ԱԳՆ ղեկավար Սերգեյ Լավրովը Երևանում հոկտեմբերի 14-ին կմասնակցի Հավաքական անվտանգության պայմանագրի կազմակերպության (ՀԱՊԿ) անդամ երկրների արտգործնախարարների խորհրդի համատեղ նիստին, հինգշաբթի հաղորդել է ՌԴ ԱԳՆ պաշտոնական ներկայացուցիչ Մարիա Զախարովան։
Երևանում հոկտեմբերի 14-ին ՀԱՊԿ հավաքական անվտանգության խորհրդի հերթական նստաշրջանին նախապատրաստվելու շրջանակում տեղի կունենա ԱԳՆ ղեկավարների, ինչպես նաև պաշտպանության նախարարների խորհրդի և ՀԱՊԿ անվտանգության խորհրդի քարտուղարների խորհրդի համատեղ նիստը։
«Այդ ձևաչափով աշխատանքին մասնակցում է Սերգեյ Լավրովը, քննարկվելու են հավաքական անվտանգության համակարգի հետագա կատարելագործման, միջազգային ահաբեկչությանը հակազդելու, ռազմական համագործակցության զարգացման հարցեր, ինչպես նաև մի շարք փաստաթղթեր, որոնք կներկայացվեն ՀԱՊԿ անդամ երկրների ղեկավարների հաստատմանը», — ասել է Զախարովան։
ՀԱՊԿ կազմի մեջ մտնում են Հայաստանը, Բելառուսը, Ղազախստանը, Ղրղըզստանը, Ռուսաստանը և Տաջիկստանը։
