ԵՐԵՎԱՆ, 6 հոկտեմբերի — Sputnik. Սիրիական հակամարտությունից տուժած բնակիչներին մարդասիրական օգնություն ուղարկելու նպատակով գործադիրն ընդունել է համապատասխան որոշում:
Կառավարության պահուստային ֆոնդից ՀՀ արտաքին գործերի նախարարությանը կհատկացվի 46,033.2 հազ. դրամ (100 հազար դոլար), որը նվիրաբերության կարգով կփոխանցվի «Հայաստան» համահայկական հիմնադրամին՝ մարդասիրական օգնություն ցուցաբերելու համար անհրաժեշտ ապրանքներ ձեռք բերելու նպատակով:
Հոկտեմբերի 5-ին Երևանից Սիրիա է մեկնել հումանիտար օգնությամբ երկրորդ օդանավը։
Այն ճանապարհում էին ՀՀ նախագահի աշխատակազմի ղեկավարի տեղակալ Վարդան Մակարյանը և ՀՀ-ում ՌԴ դեսպան Իվան Վոլինկինը։ Հումանիտար օգնությամբ բեռնված առաջին ինքնաթիռում 20 տոննա բեռ էր` առաջին անհրաժեշտության ապրանք, սնունդ, մանկական տաք հագուստ։ Ընդհանուր առմամբ Հայաստանը Սիրիային տրամադրել է 40 տոննա օգնություն։
