ԵՐԵՎԱՆ, 6 հոկտեմբերի — Sputnik. «Բարգավաճ Հայաստան», «Հայկական վերածնունդ» և «Գաղափարակից լիբերալների ալյանս» (ԳԱԼԱ) կուսակցությունները հանրությանը, ընտրողներին և ՀՀ իշխանություններին իրենց միացյալ դիրքորոշումն են արտահայտել Գյումրու ՏԻՄ ընտրությունների վերաբերյալ։
Երեք քաղաքական ուժերը նշում են, որ ընտրություններն անցել են բազմաթիվ և տարաբնույթ ընտրախախտումներով, մասնավորաբար, վարչական ռեսուրս է օգտագործվել հօգուտ գործող քաղաքապետի և «Բալասանյան» դաշինքի։
«Հիմքեր ունենք կարծելու, որ փորձ է արվում մեր կուսակցությունների օգտին տրված քվեների (նախնական արդյունքներով` ընդհանուր առմամբ 18.439 քվե) փաստացի արդյունքը նենգափոխել հօգուտ ՀՀԿ և ՀՔԴՄ կազմած «Բալասանյան» դաշինքի (14.987)՝ քաղաքային ավագանին և գործադիր իշխանությունն իր ենթակայության տակ պահելու և պահպանելու համար»,- ասված է հայտարարությունում:
Նրանք գտնում են, որ իշխանությունները պարտավոր են ընդունել, որ հարկատուների միջոցներով մշակել և ընդունել են բազմաթիվ տարընթերցումների ու թյուրըմբռնումների տեղիք տվող Ընտրական օրենսգիրք, որը փաստացի իշխանություն ունեցողներին հնարավորություն է տալիս կամայական և անհիմն մեկնաբանությունների ենթարկել այն, մանդատների բաշխումն իրականացնել ոչ թե արդարության, օրինականության, այլ քմահաճության սկզբունքով կամ ըստ քաղաքական պատվերի:
Ելնելով վերը նշվածից` նրանք հայտարարում են, որ եթե թիվ 34 Ընտրատարածքային հանձնաժողովը որոշում կայացնի Գյումրու ավագանու ընտրությունների վերջնական արդյունքներն ապօրինաբար կազմել և հրապարակել ԿԸՀ նախագահ Տ. Մուկուչյանի հրապարակային թելադրանքով, ապա այդ որոշումն իրենք վիճարկելու են ՀՀ և եվրոպական բոլոր հնարավոր դատական ատյաններում և պայքարելու են արդար վճռի համար նաև այլ եղանակներով:
«Մանդատների ապօրինի բաշխման դեպքում մեր ցուցակներով ավագանու անդամ հայտարարված անձինք բոյկոտելու են Գյումրու ավագանու բոլոր նիստերը մինչև դատական վերջին ատյանի հնարավորությունների սպառումը: Նրանք չեն մասնակցելու «ավագանու նիստ» կոչվող միջոցառումներին, եթե ավագանու կազմը ձևավորվելու է Տ. Մուկուչյանի անօրինական հրահանգներով»,- ասված է հայտարարության մեջ:
Նրանք նշել են նաև, որ հնարավոր դատական ատյաններում խնդրի կարգավորման միջոցները սպառելուց հետո իրենց դիրքորոշման կամ գործողությունների մասին հանդես կգան նոր հայտարարությամբ:
