ԵՐԵՎԱՆ, 2 հոկտեմբերի — Sputnik. Արմենուհի Մխոյան. Գյումրիում ժամը 11:00-ի դրությամբ ընտրությունները նորմալ են ընթանում. դա հիմնականում տեղամասերի ներսում, բայց հատկապես որոշ տեղամասերից դուրս՝ տեղամասին շատ մոտ տարածքում, նկատվում են կուտակումներ: Հատկանշական է, որ հավաքված մարդկանց խմբերի մեջ են նաև այս կամ այն քաղաքական ուժի կողմից ներկայացված թեկնածուները:
Նման մի կուտակման մասին Sputnik Արմենիան տեղեկացրեց Գյումրու թիվ 34/29 ընտրատեղամասի նախագահ Մելանյա Կարապետյանին, ով անմիջապես քայլեր ձեռնարկեց` կուտակումները ցրելու ուղղությամբ: Ի դեպ, տվյալ տեղամասում այդ պահին ամեն ինչ նորմալ էր ընթանում, այդ մասին փաստեցին նաև վստահված անձիք և դիտորդները:
«Ոչ մի դիտողություն ու բողոք չենք ստացել: Ամեն ինչ նորմալ է, իրար հասկանալով ենք աշխատում։ Ինչ վերաբերում է կուտակմանը, ես առավոտյան տվյալ թեկնածուին զգուշացրել էի, որ ներս չմտնի, քանի որ մեկ-երկու անգամ նա փորձ արեց ներս մտնել: Այս անգամ զգուշացրեցի և հուսամ` մենք իրար հասկացանք»,- նշեց թիվ 34/29 տեղամասի նախագահը։
Մեկ այլ` թիվ 34/30 տեղամասում, նկատելի էր քվաեխցում երկու անձի ներկայություն, սակայն բանն այն է, որ քաղաքացիներից մեկն ուներ տեսողության խնդիր: Այս դեպքում Ընտրական օրենսգիրքը թույլ է տալիս 2 անձի ներկայությունը, այս մասին տեղակացրեց նաև հանձնաժողովի նախագահ Նարինե Մելքոնայնը:
«Եթե ընտրողն ունի խնդիր, հիմնականում տեսողության հետ կապված՝ կույր է, իրավունք ունի քվեախցում լինել օգնողի հետ, այդ ժամանակ արձանագրության մեջ ամրագրվում է, թե ով է օգնել այդ անձին համապատասխան ձևով կատարել ընտրությունը: Սա նորմալ է»,-նշեց Մելքոնյանը:
Sputnik Արմենիան շարունակում է հետևել ընտրական Գյումրու իրադարձություններին։
