ԵՐԵՎԱՆ, 21 սեպտեմբերի-Sputnik. Հայաստանի Հանրապետությունն այսօր դարձավ 25 տարեկան:
Այդ պատմական իրադարձությունը ամրագրվել է 1991թ. սեպտեմբերի 21-ին անցկացված հանրաքվեով։
Հայ ժողովուրդը դրական պատասխան տվեց վաղուց սպասված հարցին. «Համաձա՞յն եք, որ Հայաստանի Հանրապետությունը լինի անկախ, ժողովրդավարական հանրապետություն` ԽՍՀՄ կազմից դուրս»: Հայ ժողովուրդն «այո» ասաց անկախությանը։
Դեռևս Անկախության հանրաքվեի արդյունքները չամփոփված` մարդիկ դուրս էին եկել փողոց և նշում էին իրադարձությունը: Հանրաքվեն անցկացվեց խորհրդային ընտրական օրենսգրքով։ Անկախության հանրաքվեի ընթացքին հետևեց 117 դիտորդ` 25 երկրից:
Հանրաքվեի հիման վրա 1991թ. սեպտեմբերի 23-ին հանրապետության Գերագույն խորհուրդը Հայաստանը հռչակեց անկախ պետություն։
Ծանր գնով ձերք բերված բաղձալի անկախությունը հայ ժողովուրդը ոչ պակաս ծանր գնով պահպանում է ու հարատևում։
Համայն հայությանը շնորհավորում ենք անսահման հպարտություն ներշնչող Անկախության տոնի առթիվ, որի կերտմանը նպաստ ունի յուրաքանչյուր հայ։
