Այլևս չկա Գագիկ Բեգլարյանը, որ քաղաքապետի պաշտոնից հեռացվեց ու տրանսպորտի նախարար նշանակվեց: Չկա էներգետիկայի դեռևս նորանշանակ նախարար Յոլյանը։ Գյուղնախարար Սերգո Կարապետյանը ևս արդեն պաշտոնանկ է եղել:
Նոր նախարարները լայն հասարակության համար հիմնականում անհայտ դեմքեր են: Նրանց կենսագրությունն էլ հարուստ չէ ո՛չ մականուններով, ո՛չ զբաղեցրած պաշտոնների առատությամբ, անգամ լուսանկարներն է դժվար գտնել համացանցում: Ինչևէ, նրանց մասին որոշ մանրամասներ պարզել ենք:
Նախագահի հրամանով ֆինանսների նախարար է նշանակվել Վարդան Արամյանը: Նա նորանշանակներից քիչ թե շատ ամենահայտնին է: Նա նախարար է նշանակվել՝ ազատվելով ՀՀ նախագահի աշխատակազմի ղեկավարի առաջին տեղակալի պաշտոնից: Ծնվել է 1975 թվականին։
2003 թվականին նշանակվել է ԿԲ դրամավարկային քաղաքականության վարչության և արտաքին հարաբերությունների բաժնի պետ։ Տիգրան Սարգսյանի վարչապետության օրոք 2008 թվականին նշանակվեց ֆինանսների նախարարի առաջին տեղակալ։ Տիգրան Սարգսյանից հետո ֆինանսական հաշտարարի գրասենյակում էր աշխատում՝ որպես հոգաբարձուների խորհրդի անդամ:
Գագիկ Խաչատրյանը պաշտոնանկ արվեց Մոսկվայում: Նա այս օրերին գործուղման է, երբեմնի հիպերնախարարը կվերադառնա պաշտոնական անորոշ ապագայով:
Կարիերայի առումով անորոշ է նաև Գագիկ Բեգլարյանի բախտը: Քաղաքապետ ու հետո տրանսպորտի նախարար աշխատած Բեգլարյանին պաշտոնից ազատեցին, ինչպես սպասվում էր, որդու հարսանիքից հետո, հիմա այստեղ նախարարը Վահան Մարտիրոսյանն է:
Կապի և տրանսպորտի նորանշանակ նախարար Վահան Մարտիրոսյանի մասին ևս տեղեկությունները խիստ սահմանափակ են: «Հրապարակ» օրաթերթն, օրինակ, գրում է, որ նա «Ռոստելեկոմ»-ի նախկին աշխատող է:
Մի քիչ ավելի հայտնի է Իգնատի Առաքելյանի մասին: Նա արդեն մեր երկրի գյուղատնտեսության նախարարն է: Սերգո Կարապետյանն էլ չկա:
Հայտնի է, որ Իգնատի Առաքելյանը Երևանի կոնյակի գործարանի տնօրենն է եղել: Ծնվել է 1972 թվականին։ Ավարտել է Երևանի ճարտարապետաշինարարական ինստիտուտը՝ ինժեներ-տնտեսագետի որակավորմամբ, տնտեսագիտության թեկնածու է:
1998-ից առ այսօր Երևանի կոնյակի գործարանի Պեռնո Ռիկար խմբի փորձագետ հաշվապահ- գլխավոր հաշվապահ-ֆինանսավարչական տնօրեն-գործադիր տնօրենի տեղակալ- գործադիր տնօրեն ճանապարհն է անցել:
Հիմա էներգետիկայի նախարարի մասին։ Նա Աշոտ Մանուկյանն է: էներգետիկայի նախարարության հին, բայց ոչ այդքան հայտնի կադրերից է: Նախարար նշանակվելուց առաջ Հրազդանի ՋԷԿ-ի տնօրենն է եղել։
Ավելի կոնկրետ՝ ծնվել է 1968 թվականին, անկուսակցական է, ավարտել է Հայաստանի պետական ճարտարագիտական համալսարանը՝ ինժեներ-մեխանիկ մասնագիտացմամբ, ապա՝ Հայաստանի ամերիկյան համալսարանը, ստացել է գործարար կառավարման մագիստրոսի որակավորում, տնտեսագիտության դոկտոր է։
Ինչպես ասում են՝ փոփոխությունների քամին դեռ նոր է իրեն զգացնել տալիս: Սկիզբը խոստումնալից է:
