ԵՐԵՎԱՆ, 20 սեպտեմբերի — Sputnik, Լաուրա Սարգսյան. Հայաստանը հարուստ է ոչ միայն իր մշակույթով, այլ նաև խոհանոցով, որն այսօրվա դրությամբ պատշաճ կերպով ներկայացված չէ համաշխարհային շուկայում։
«Մենք հնարավոր ամեն ինչ կանենք, որպեսզի հայկական խոհանոցն արժանի տեղ զբաղեցնի աշխարհում»,- ասաց «Հայ խոհարարական ավանդույթների զարգացման և պահպանման» հասարակական կազմակերպության ղեկավար Սեդրակ Մամուլյանը։
Նրա խոսքով, նման փառատոները, մասնավորապես, տոլմայի և խորովածի, ոչ միայն վերականգնում են հին ավանդույթները, այլ նաև հերթական անգամ թույլ են տալիս ցույց տալ հայկական խոհանոցի բազմազանությունը։ Նրանք նաև նպաստում են զբոսաշրջության զարգացմանը։
«Ախթալան այն քաղաքներից է, որը ներառված է Հայաստանի սահմանամերձ տարածքների զարգացման ծրագրում։ Փառատոնի անցկացման տարիներին բարելավվել է ոչ միայն տեղանքի ենթակառուցվածքը, այլ նաև իրենց ավանդույթների և ներկայացվող արտադրանքի նկատմամբ մարդկանց վերաբերմունքը»,- ասաց Մամուլյանը։
Նա հիշում է, թե ինչպես սկզբում քչերն են գիտակցել նման միջոցառումների կարևորությունը և յուրաքանչյուրին ստիպված էին համոզել, որպեսզի մասնակցի։
Այսօր արդեն փառատոնի մասնակիցների թիվը մի քանի անգամ ավելացել է։ «Եթե փառատոնի անցկացման տարիներին ընդամենը հինգ թիմ էր հավաքվում, ապա այսօր մենք ունենք 35 թիմ։ Մենք կանգ ենք առել մասնակիցների այդ թվի վրա, որովհետև ֆիզիկապես անհնար է ավելի շատ մարդ ընդգրկել»,- նշեց Մամուլյանը։
Իր հերթին գալիք փառատոնով շահագրգռված է նաև հարևան Վրաստանը. կժամանեն բազմաթիվ զբոսաշրջային խմբեր և նկարահանման խումբ, որը ֆիլմ կնկարահանի Հայաստանի ազգային խոհանոցի ավանդույթների և սովորույթների մասին։
Մի քանի տարի առաջ նման ֆիլմ ցուցադրվել է Լեհաստանում։ Այդ ժամանակ նկարահանումների համար Հայաստան է ժամանել հայկական արմատներով լեհ խոհարար և լրագրող Ռոբերտ Մակլովիչը։ Մայիսին սպասվում է Մակլովիչի հերթական այցը պատմական հայրենիք և, ինչպես խոստովանեց Մամուլյանը, հնարավոր է` այն նվիրված լինի տոլմայի փառատոնին։
Մեկնաբանելով Հայաստանում օտարերկրյա խոհանոցների առատությունը, Մամուլյանը նշեց, որ նախընտրում է քարոզել ազգային արժեքները և խոհանոցը։
Խորովածի փառատոնի ծրագիրը հագեցած է նաև բազմաթիվ մշակութային միջոցառումներով։ Կազմակերպիչները մասնակիցներից սպասում են նոր և ստեղծարար գաղափարներ։
