ԵՐԵՎԱՆ, 19 սեպտեմբերի — Sputnik. Հայաստանը պետք է շտապ լուծի առանց մաքսային ստուգման ապրանքը Ռուսաստան առաքելու հարցը, Sputnik Արմենիային ասաց ԱՊՀ Տնտեսական զարգացման գործնական կենտրոնի գլխավոր տնօրեն Վլադիմիր Սավչենկոն։
«Հայաստանը եզակի պետություն է, որն անդամակցել է ԵՏՄ-ին` անդամ երկրների հետ չունենալով սահման։ Ուստի հայկական ապրանքը Ռուսաստան և ռուսական ապրանքն էլ Հայաստան անարգել առաքելու համար պետք է լուծել մաքսային անցման բարդ հարցերը։ Դա պետք է արագ անել», — ասաց նա։
Սավչենկոյի խոսքով, անհրաժեշտ է հասնել նրան, որ հայտնվեն էլեկտրոնային կնիքներ, որպեսզի «Հայաստանի տարածքում կնքված ապրանքն անարգել, առանց մաքսային ստուգումների հասնի Ռուսաստանի տարածք և հակառակը։
«Մենք այսօր խնդիր ունենք. երբ չինական կոնտեյներն իր տարածքով անցնում է 15 րոպե, իսկ ռուսական տարածքով` 72 ժամ, ԵՏՄ-ը պետք է զբաղվի այդ խնդիրներով»,- ասաց փորձագետը։
Նա նշեց, որ ԵՏՄ առջև ծառացած են հեռանկարային շուկաներ և տարածքներ նվաճելու խնդիրներ, մասնավորապես, Վիետնամը, բայց առկա են կոնկրետ տեխնոլոգիական խնդիրներ։ Դրանց շարքում է ապրանքնի առաքումը։
Սավչենկոյի կարծիքով, այդ հարցի լուծումը թույլ կտա Հայաստանին՝ զգալ ԵՏՄ մտնելու արդյունքը։
«Այսօրվա խնդիրն է, որ ապրանքն անարգել անցնի։ Ռուսաստանն ընդունել է իր օրենքը, իսկ ինչո՞ւ կոնտեյները չի կարող շարժվել։ ԵՏՄ-ը պետք է ակտիվ զբաղվի դրանով, գտնի այն կետերը, որոնք միավորում են ազգերին։ Գլոբալ մտածեք, լոկալ սկսեք։ Դրա վրա պետք է հենվել»,- ասաց նա, միաժամանակ նշելւվ, որ Հայաստանի և Ռուսաստանի միջև ապրանքաշրջանառությունն ճում է։
Ինչպես ավելի վաղ Երևանում հայտարարել է ՌԴ տրանսպորտի նախարար Մաքսիմ Սոկոլովը, 2016թ-ի ընթացքում Հայաստանի և Ռուսաստանի միջև ապրանքաշրջանառությունն աճել է 10 տոկոսով` հասնելով 450 մլն դոլարի։
