ԵՐԵՎԱՆ, 13 սեպտեմբերի — Sputnik. Հայկական պրովայդերների հաճախորդները վերջերս հաճախ են բողոքում կապի որակից, համացանցի դանդաղ աշխատանքից ու մերթընդմերթ խափանումներից։
Sputnik Արմենիան փորձել է պարզել՝ կապվա՞ծ է դա վերջերս շրջանառվող լուրերի հետ, թե իբր հեռուստահաղորդակցման խարդախության մեջ կասկածվող Չինաստանի քաղաքացիներին արտաքսել են Հայաստանից:
Վերջերս ԶԼՄ-ներում տեղեկություն է հայտնվել այն մասին, որ Հայաստանի իրավապահ մարմինները Չինաստան են արտաքսել 129 քաղաքացու, այդ թվում՝ Թայվանի 78 բնակչի, որոնք կասկածվում են հեռուստահաղորդակցման ոլորտում խարդախություններ իրականացնելու մեջ, հայտնում է Սինհուա չինական լրատվական գործակալությունը` հղում անելով հասարակական անվտանգության նախարարությանը։
Առցանց պարբերականների տվյալներով, կասկածյալները ձերբակալվել են օգոստոսի 20-ին, այն բանից հետո, երբ հայ ոստիկանները ստուգումներ են իրականացրել նրանց թաքստոցներում։
Խուզարկության ժամանակ ոստիկանները հայտնաբերել են տեխնիկական միջոցների խոշոր խմբաքանակ, այդ թվում` համակարգիչներ և սմարթֆոններ։
Նշվում է նաև, որ ենթադրյալ խարդախները կասկածվում են խարդախության 50 դեպք իրականացնելու մեջ՝ մոտ 1.2 մլն դոլար արժողության։ Նրանք գումարներ էին շորթում Չինաստանի բնակիչներից։
Sputnik Արմենիայի խնդրանքով ՀՀ ոստիկանության մամուլի ծառայությունը մեկնաբանեց այդ լուրը։ Իրավապահ մարմինների աշխատակիցները նշեցին, որ նման տեղեկատվություն չունեն, և դա, հավանաբար, «խայծ» է։
«Վերջին երկու ամիսվա ընթացքում ինտերնետս վատ է աշխատում։ Ես զանգահարել եմ տեխնիկական սպասարկման ծառայություն, որտեղ ինձ տարբեր պատասխաններ են տվել. «Վթար է տեղի ունեցել, մասնագետներն աշխատում են այն վերացնելու ուղղությամբ» կամ «Մենք տեսնում ենք, որ մեզ մոտ ամեն ինչ լավ է, հավանաբար, խնդիրը ձեր ռոուտերի մեջ է»», — Sputnik Արմենիային պատմեց համացանցի օգտատեր Աննան։
Նրա խոսքով, վարպետները եկել են իրենց տուն, նայել ռոուտերը և նշել, որ ամեն ինչ նորմալ է։
Համացանցի աշխատանքից դժգոհում է նաև մեկ այլ օգտատեր` Արմինեն։
«Վայ-ֆայը վատ է աշխատում, խնդիրներ են առաջացել բաց թողնված ծրագրերը հետ տալու ֆունկցիայի հետ», — ասաց նա։
Գուցե իսկապես որևէ մեկը խափանել է Հայաստանի ինտերնետ կապը կամ գուցե հեռուստահաղորդակցման խարդախություններն իրականացրել են ոչ թե չինացիները, այլ բոլորովին այլ մարդիկ, և հենց այդ պատճառով էլ հայ օգտատերերի մոտ ամեն օր խնդիրներ են առաջանում։
Պրովայդերներից մեկի ներկայացուցիչները, սակայն, ասացին, որ ներկա պահին որևէ խոշոր վթար չկա, որի մասին պետք է շտապ տեղեկացնել օգտատերերին։
Sputnik Արմենիան կհետևի դեպքերի զարգացմանը։
