ԵՐԵՎԱՆ, 9 սեպտեմբերի — Sputnik. Լոռու մարզի Դսեղ գյուղում սեպտեմբերի 9-ին մեկնարկում է «Թումանյանական հեքիաթի օր» տիկնիկային թատրոնների 11-րդ միջազգային փառատոնը, Sputnik Արմենիայի թղթակիցն հաղորդեց «ՅՈՒՆԻՄԱ-Արմենիայի» նախագահ Արմեն Սաֆարյանը։
«Այսօր Հովհաննես Թումանյանի ծննդավայում` Դսեղ գյուղում, ժամը 14։00-ին մեկնարկում է «Թումանյանական հեքիաթի օր» փառատոնը, որը կտևի մինչև սեպտեմբերի 14-ը»,- ասաց նա։
Միջոցառումը կսկսվի Թումանյանի «Շունն ու կատուն» հեքիաթի մոտիվներով բեմադրված ներկայացմամբ. այս տարի նշվում է «Շունն ու կատուն» ստեղծագործության 130-ամյակը։
Հայաստանի անկախության 25-ամյակին նվիրված փառատոնին կմասնակցեն հայկական և արտասահմանյան տիկնիկային թատրոններից 58 ներկայացուցիչներ։ Դսեղ գյուղից բացի` միջոցառումը տեղի կունենա նաև Երևանում և առաջին անգամ Շիրակի մարզի քաղաքներում և գյուղերում։ Փառատոնի ընթացքում իրենց վարպետությունը կցուցադրեն տիկնիկային թատերախմբեր Ռուսաստանից, Ուկրաինայից, Վրաստանից, Իտալիայից, Հունգարիայից, ԼՂՀ-ից, ինչպես նաև Հայաստանի տարբեր մարզերից։
Ընդհանուր առմամբ կցուցադրվի 22 ներկայացում։
«Թումանյանական հեքիաթի օր» ամենամյա միջազգային փառատոնը կազմակերպում է «ՅՈՒՆԻՄԱ-Արմենիա» միության նախաձեռնությամբ` Հայաստանի նախագահի աշխատակազմի և մշակույթի նախարարության աջակցությամբ։
