ԵՐԵՎԱՆ, 3 սեպտեմբերի — Sputnik, Անի Լիպարիտյան. Այսօր մենք կճանապարհորդենք Մանկական երկաթուղու գնացքով։ Այս երկաթուղին առաջիններից է հետխորհրդային տարածքում: Մյուս տարի Երևանի Մանկական երկաթուղին կնշի իր 80-ամյա հոբելյանը: Այս ընթացքում լայնամասշտաբ շինարարական և վերականգնողական աշխատանքներ են տարվել այստեղ:
Մի քիչ պատմություն
Մանկական երկաթուղին 1937 թվականից ուրախացնում է երեխաներին, ինչպես նաև ուսանողներին և նրանց, ովքեր պարզապես ցանկանում են բարձրացնել սեփական տրամադրությունն ու մաքուր օդում «ճանապարհորդել» պատմական երկաթուղով:
Երկաթգծի երկարությունը է 2.1 կիլոմետր է, իսկ գնացքը գտնվում է Հրազդան գետի կիրճի քաղաքային զբոսայգում, այն անցնում է հենց գետի կողքով: Այս վայրը առողջ ապրելակերպի սիրահարների համար պարզապես երազանք է. ծառերով շրջապատված այգի, մաքուր օդ, գետ և բարձր տրամադրություն:
Ամբոջ գաղտնիքն այն է, որ բացի կայարանից և երկաթուղուց, այստեղ կան նաև ատրակցիոններ:
Կիրճի ռեստորաններից մեկի մոտ հանդիպեցինք Սուրեն անունով մի տարեց մարդու: Սուրենն այստեղ է աշխատում արդեն շուրջ 10 տարի:
«Մանկական երկաթուղու շինարարությունը սկսվել է Հայաստանի Կոմկուսի ԿԿ առաջին քարտուղար Աղասի Խանջյանի նախաձեռնությամբ, ով այդպես էլ չտեսավ իր մտահղացման իրականացումը: 1936 թվականին նա դրեց առաջին քարը «Փարոս» կոչվող կայարանում», — ասաց Սուրենն` ավելացնելով, որ դրանից հետո նա ողբերգական վախճան ունեցավ:
Պատահականություն էր, թե ոչ, սակայն երկաթուղու այգու գլխավոր ճարտարապետ Միքայել Մազմանյանին հաջորդ տարի աքսորեցին Նորիլսկ:
«90-ականներին այստեղ շինարարական աշխատանքներ տարվեցին: 2000 թվականից հետո Իտալիայից ատրակցիոններ բերեցին», — ասաց Sputnik Արմենիայի զրուցակիցը:
Երեխաներին` պաղպաղակ, մայրիկին` ծաղիկներ
Մանկական երկաթուղին բաց է տարվա տաք եղանակին` մայիսից մինչև հոկտեմբերի վերջ: Սուրենի խոսքով` աշխատանքային օրերին այստեղ երեխաներ քիչ են լինում, իսկ հանգստյան օրերին հերթ է գոյանում: Երբեմն այստեղ համերգներ և այլ տոնական միջոցառումներ են անցկացվում երեխաների և մեծահասակների համար:
Ընդամենը 300 դրամով ցանկացած ոք կարող է տոմս գնել դրամարկղից և բաց վագոններով գնացք նստել: Ի դեպ` մինչև երեք տարեկան երեխաների համար այն անվճար է:
«Սա մեր մանկության այգին է: Մենք վախենում էինք, որ այն կարող են վերացնել, որ մեր երեխաներն այլևս հնարավորություն չեն ունենա գնացք նստել այստեղ, ինչպես դա անում էինք մենք, երբ փոքր էինք», — ասաց Մարինան, ով այստեղ էր բերել թոռնիկին:
Իսկապես, Հայաստանը 80-90-ականներին ծանր ժամանակներ է ապրել, սակայն այգին հնարավոր եղավ պահպանել:
Sputnik Արմենիայի թղթակիցները նույնպես հասցրեցին ցածր փայտե նստարաններով գույնզգույն գնացքով շրջել` թեթև քամու և անձրևի տակ: Ի դեպ` երկաթուղում կա նաև թունել, որտեղով էլ անցնում է գնացքը:
Կանգառներ չկան… Հուսով ենք, որ մոտ ապագայում այգին, երկաթուղին ու գնացքը կբարեկարգվեն, չէ՞ որ այս վայրը կարող է խթանել նաև զբոսաշրջությունը և մեծ թվով տուրիստներ բերել այստեղ, թեև նրանք նույնիսկ հիմա են գալիս տեսնելու Երևանի այս հին այգին, որն այդքան թանկ է տեղացիների համար:
