ԵՐԵՎԱՆ, 6 հուլիսի-Sputnik, Անի Լիպարիտյան. Վաղ առավոտյան Երևանի Սիրահարների այգում հավաքվել էին մայրաքաղաքի բնակիչները և հյուրերը։
Երիտասարդները շփվում էին, ծիծաղում, շատերը հանգստանում էին նստարաններին, երիտասարդ մայրիկները զբոսնում էին նորածինների հետ, իսկ ավելի մեծ տարիքի երեխաները խաղում էին ավազի մեջ։ Ոմանք քննարկում էին Եվրո 2016-ը, մյուսները` կենցաղային խնդիրներ, շատերը գիրք կամ ամսագիր էին կարդում։
Նստարաններից մեկի վրա զրուցում էին մեծահասակ մարդիկ` Ալբերտը և Ռաֆայելը։ Այստեղ են նրանք ուսանողական տարիներին պատրաստվել քննությունների։
«Ընկերս շուտով 80 տարեկան կդառնա։ Ես միշտ այստեղ եմ ապրել, իսկ նա միշտ ապրել է Բաղրամյան պողոտայում։ Սկզբում այստեղ սովորական այգի էր` կարուսելներով և ավտոդրոմով։ Հիմա սա խնամված և հաճելի այգի է։ Մեզ այստեղ դուր է գալիս, ամռանը փրկվում ենք շոգից»,- ասաց Ալբերտը։
Նա կարծում է, որ բնակչության շարքում բարեկրթությունն աստիճանաբար աճում է։
«Մարդիկ սկզբում աղտոտում էին, բայց հետո հասկացան, որ այս այգին իրենց և իրենց երեխաների համար է, և սկսեցին խնամքով և սիրով վերաբերվել այգուն»,- ասաց նա։
Sputnik Արմենիայի զրուցակիցը, պատասխանելով այն հարցին, թե հաճա՞խ են նրանք սիրահարներ տեսնում այգում, պատասխանեցին` այո, բայց պարզվեց, որ երիտասարդների պահվածքի մեջ ամեն ինչ չէ, որ նրանց դուր է գալիս։
«Ցերեկը ոմանք իրենց այդքան պարկեշտ չեն պահում` մոռանալով այն մասին, որ այգում կան երեխաներ և տարեց մարդիկ»,- մի փոքր վրդովված ասաց Ալբերտը։
Ռոմանտիկ զբոսայգի
Ի դեպ, նախկինում զբոսայգին կոչվել է մեծ ռուս բանաստեղծ և դրամատուրգ Ալեքսանդր Պուշկինի անունով։
Ինչպես պնդեցին հնաբնակները, XVIII դարում այստեղ այգի է եղել, որը կոչվել է Կոզեռնի այգի` մոտակա թաղամասի անունով։ Խորհրդային տարիներին այգին նոր տեսք է ստացել և 1949թ.-ին անվանակոչվել Ալեքսանդր Պուշկինի անունով։ Այգում մի քանի կարուսելներ են եղել, իսկ ծառուղիներում` նստարաններ։
1970թ.-ին այգին վերանվանվել է Բարեկամություն, իսկ 1995թ.-ին ստացել այժմյան անունը` Սիրահարների այգի։
Սիրո կանաչ ծառուղի
Այժմ այգում մեկ հեկտարից ավել կանաչ տարածություն է, 370 ծառ, 4 ջրվեժ, 26 քարե կոմպոզիցիա` չհաշված ավելի քան 300 մետր ընդհանուր երկարությամբ նստարանները։ Այստեղ հաճախ են ֆոտոշարքեր կազմակերպում, հատկապես` հարսանեկան։ Ընդ որում` տարվա եղանակները չեն խանգարում։ Այստեղ անցկացվում են տարբեր միջոցառումներ, շնորհանդեսներ, ելույթ են ունենում արտիստներ։
Այգու դիզայնը ստեղծել է ճարտարապետ սիրո երկրից` Ֆրանսիայից։ Պիեռ Ռամբախը ոգեշնչվել է ճապոնական ճարտարապետությամբ, որը հիմք է հանդիսացել նախագծի համար։
