ԵՐԵՎԱՆ, 18 օգոստոսի — Sputnik. Հայաստանում արտակարգ իրավիճակների քանակը տասը տարվա ընթացքում առաջին անգամ զգալիորեն կրճատվել է, լրագրողներին Sputnik Արմենիա մամուլի կենտրոնում ասաց Հայաստանի ԱԻՆ ճգնաժամային կառավարման ազգային կենտրոնի պետ Հովհաննես Խանգելդյանը։
«Երկար տարիներ մենք նման վիճակագրություն չենք ունեցել, արձանագրվել է արտակարգ դեպքերի զգալի նվազում», — ասաց Խանգելդյանը։
Նրա խոսքով` 2016 թվականի առաջին կիսամյակում արձանագրվել էր 5203 արտակարգ պատահար, ինչը 555 դեպքով պակաս է 2015 թվականի նույն ժամանակահատվածի համեմատ։
Այդ արտակարգ իրավիճակների արդյունքում զոհվել է 229 մարդ, ևս 4119-ը տուժել է, այն դեպքում, երբ 2015 թվականի նույն ժամանակահատվածի համեմատ ցուցանիշը կազմել է, համապատասխանաբար, 276 և 4191։
Արտակարգ պատահարների նվազումը նկատելի է բոլոր ոլորտներում, մասնավորապես, տեխնոգեն պատահարների հետ կապված։ Դրանց քանակը նվազել է 19,2% կամ 420 դեպքով։ Հատկապես այս ցուցանիշը նկատելի է ՃՏՊ-ների և հրդեհների վիճակագրությունում։
Հրդեհների ընդամենը 1406 դեպք է գրանցվել այս տարվա առաջին կիսամյակի ընթացքում` 2015 թվականի նույն ժամանակահատվածի 1808 ցուցանիշի համեմատ։ Խանգելդյանի խոսքով` դրական է ազդել այս տարվա եղանակը, տեղումները առատ են եղել։
«Ինչ վերաբերում է ՃՏՊ-ներին, ամեն տարի մենք պատահարների աճ էինք արձանագրում։ Վերջին 10 տարիների ընթացքում ես չեմ հիշում դեպք, որ ավտոմեքենաների ավելացման պարագայում դրանց քանակը նվազեր», — ասաց Խանգելդյանը։
Նա ավելացրեց, որ այս տարի ՃՏՊ-ների ցուցանիշը նվազել է 72 դեպքով (4,9%), ընդ որում` զգալիորեն կրճատվել են մահվան ելքով պատահարները` 18,9%` մինչև 107 դեպք։ 2016 թվականի վեց ամիսների ընթացքում տուժել է 1956 մարդ, անցյալ տարի` 2077-ը։
Խանգելդյանը նշեց, որ ՃՏՊ-ների քանակը հաջողվել է նվազեցնել ոստիկանության գործողությունների, քաղաքացիների կարգապահության, ճանապարհների որակի բարելավման, ինչպես նաև Գերմանական, Ամերիկյան և Ճապոնական բարձրակարգ ավտոմեքենաների ավելացման շնորհիվ։
