ԵՐԵՎԱՆ, 18 օգոստոսի-Sputnik. Փոխզիջման մասին այս պահին խոսելը արտգործնախարարի տեղակալ Շավարշ Քոչարյանը համարում է պարտվողականություն, քանի որ Բաքվի որևէ պաշոտնյայից նման հայտարարություն չի լսել։
«Երբ Բաքուն խոսի զիջումների մասին, այդ ժամանակ կարելի է խոսել փոխզիջումների մասին։ Մինչ այդ նման հարցեր բարձրացնելը կոռեկտ չէ։ Այլ բան է, որ բանակցային գործընթացի մասին խոսելիս հայկական կողմերն ասում են` փոխզիջումների պատրաստ ենք։ Քանի դեռ որևէ հայտարարություն չկա Ադրբեջանի կողմից, քանի դեռ այնտեղից ավելի են կոշտացնում դիրքերը, հայկական կողմից զիջումների մասին խոսելն անիմաստ է։ Ինչո՞ւ Ադրբեջանում երբեք չեմ լսել, որ որևէ լրագրող իրենց պաշտոնյային հարցնի` իսկ դուք ի՞նչ զիջման մասին եք խոսում»,-ասաց Քոչարյանը։
Քոչարյանի վստահեցմամբ, հայկական կողմի դիրքորոշումը հստակ է` Լեռնային Ղարաբաղը չի կարող լինել Ադրբեջանի կազմում, երկրորդ` պետք է երաշխավորված լինի ԼՂՀ ժողովրդի և հանրապետության անվտանգությունը։
Նա ավելացրեց, որ փոխզիջման մասին Հայաստանի որևէ պաշտոնյա խոսելու իրավունք չունի, քանի որ հարցն առաջնահերթության կարգով վերաբերում է ԼՂՀ-ին։
«Այլ բան է, որ այսօր ստեղծված իրավիճակում, քանի դեռ ԼՂՀ-ն լիարժեք չի մասնակցում բանակցային գործընթացին, չընդհատելու համար այդ գործընթացը, Հայաստանը մասնակցում է։ Հայաստանը, սակայն, իրավասու չէ խոսել ԼՂՀ-ի փոխարեն կարգավիճակի ու տարածքային ամբողջականության մասին»,-ասաց նա։
Վերջում փոխարտգործնախարարը նշեց, որ հավատարիմ են մնում Վիենայում և Սանկտ Պետերբուրգում կայացած բանակցային գործընթացին։
Նա հիշեցրեց, որ պետք է ամրագրել կրակի դադարեցման ռեժիմը, հավատարիմ մնալ 94 թվականի զինադադարի մասին համաձայնագրին, դիտորդական առաքելության կարողություններն ավելացնել, ներդնել այն մեխանիզմը, որը կոչված է լինելու հետաքննել այն միջադեպերը, որոնք պարբերաբար տեղի են ունենում։
