ԵՐԵՎԱՆ, 12 օգոստոսի — Sputnik. Ներկայացնելով ՀՀ գյուղատնտեսության բնագավառում իրականացվող ծրագրերը, գյուղնախարարի տեղակալ Արմեն Հարությունյանը մանրամասնեց միջազգային կառույցների աջակցությամբ իրականացվող ծրագրերի արժեքը:
Նրա խոսքով, ԵՄ-ի աջակցությամբ այս պահին իրականացվում է 25 մլն եվրոյի ծրագիր, ևս 10 մլն եվրոյի ծրագիրն այս պահին քննարկման փուլում է:
Նույն կառույցը իրականացնում է նաև օրգանական գյուղատնտեսության զարգացման ծրագիրը՝ 2,8 մլն եվրո արժողությամբ:
Ավստրիայի զարգացման գործակալության ֆինանսավորումը շուրջ 4 մլն եվրո է, իսկ Շվեյցարիայի զարգացման գործակալության 20 մլն եվրո ծրագիրը իրականացվելու է մինչև 2019թ-ի ավարտը:
ԱՄՆ ՄԶԳ-ն ֆինանսավորվող մաքուր էներգիայի և ջրի ծրագիրը, որի բաղադրիչներից է նաև ձկնաբուծության զարգացումը, 5,6 մլն դոլար է, համատարած հաշվառման ծրագրի արժեքը ՝ 2 մլն, գործընկերություն հանուն գյուղական համայնքների ծրագիրը՝ 4 մլն, գյուղի զարգացման արդի նախաձեռնությունը՝ 4 մլն, և ագրոբիզնեսի ուսումնական կենտրոնին օժանդակության ծրագիրը՝ 2,5 մլն դոլար:
Բացի այդ, այս պահին ՀՀ կառավարությունը Գերմանական վերակառուցման եւ զարգացման բանկի (KfW) հետ քննարկում է գյուղատնտեսության ապահովագրության ներդրման մի քանի միլիոն եվրո գնահատվող ծրագիրը:
Սրանք գյուղնախարարության պաշտոնյայի թվարկած միայն խոշոր ծրագրերն են, որոնց զուգահեռ իրականացվում են նաև մի քանի միլիոն դոլարի մանր ծրագրեր:
Նշենք, որ այս գումարները Հայաստանի գյուղատնտեսության բնագավառին են տրամադրվում անվարձահատույց՝ դրամաշնորհների տեսքով, բայց կան նաև տասնյակ միլիոնների հասնող վարկային ծրագրեր:
«Օրինակ, ՀԲ-ն շուրջ 30 մլն եվրո է ուղղելու գյուղացիական կոոպերատիվների զարգացմանը, բացի այդ, առաջիկայում 3-4 ջրամբարներ է նախատեսվում կառուցել՝ որպես գյուղատնտեսական ենթակառուցվածքների ստեղծում, միջազգային վարկային կազմակերպությունների ֆինանսավորմամբ: Ավելի փոքր մակարդակով մարզերի գյուղական համայնքներում տարբեր ծրագրեր են իրականացվում նաև առանձին երկրների կազմակերպությունների միջոցներով»,- ասաց փոխնախարարը:
Իսկ թե ինչու գյուղացին չի նկատում այս ծավալի ֆինանսական աջակցության արդյունքը, Sputnik Արմենիայի հարցին Արմեն Հարությունյանն այսպես պատասխանեց.
«Մենք 340 000 գյուղացիական տնտեսություն ունենք, այս բոլոր ծրագրերն անցնում են մրցակցային ձևաչափով, և կան տնտեսություններ, որոնք դիմում են, ստանում են այդ օժանդակությունը, կան նաև, որոնց փաստաթղթերը չեն համապատասխանում»:
Ուստի, փոխնախարարը կարծում է, որ բողոքում են հիմնականում նրանք, ովքեր ինչ-որ պատճառով դուրս են մնում դրամաշնորհների ծրագրերից:
