ԵՐԵՎԱՆ, 28 սեպտեմբերի – Sputnik. Գյուղական կյանքի և ավանդույթների փառատոնին ներկայացված էին տարբեր մարզերի բերքն ու բարիքը, պանրի տեսականի, գինիներ, հյութեր, ձիթապտուղ, չրեր, բուսական թեյեր, մթերքներ գոմեշի կաթից, էկոլոգիապես մաքուր օճառներ, շինշիլաներ և այլն, ինչպես նաև կազմակերպվել էր ձեռագործ աշխատանքների ցուցադրություն-վաճառք:
Հայաստանի գյուղատնտեսության փոխնախարար Գառնիկ Պետրոսյանի խոսքով` Գյուղական կյանքի և ավանդույթների փառատոնը հայկական գյուղն ու գյուղական ավանդույթները ներկայացնելու հրաշալի առիթ է։
«Գյուղատնտեսական տարին մոտենում է ավարտին, և մեր հանրապետության տարբեր մարզերի գյուղացիական տնտեսությունները և ֆերմերային խմբերը, որոնք ամբողջ տարվա ընթացքում մեծ նվիրումով ու աշխատասիրությամբ, հայրենի հող ու ջրի նկատմամբ անսահման սիրով և նաև մեծ դժվարությամբ բերք ու բարիք են արարել, այսօր հնարավորություն ունեն այստեղ ներկայացնելու իրենց աշխատանքի պտուղները»,- իր խոսքում նշեց փոխնախարարը։
Հայաստանում ԵՄ պատվիրակության արտաքին համագործակցության պատասխանատու Ջոն Բարքերն իր հերթին ասաց, որ ԵՄ–ն ուրախությամբ է աջակցում նման գեղեցիկ միջոցառման կազմակերպմանը, ինչը լիովին համահունչ է եվրոպական կառույցների կողմից Հայաստանի գյուղատնտեսության աջակցմանը։
Միջոցառմանը մասնակցում էին ավելի քան 70 ֆերմերային խմբեր, գյուղատնտեսության ոլորտի ձեռներեցներ Հայաստանի բոլոր մարզերից և Վրաստանից, Արցախից, ովքեր ներկայացնում են իրենց արտադրած գյուղմթերքը` ողջ բազմազանությամբ:
Փառատոնը կազմակերպվել էր Գյուղատնտեսության աջակցության «Կանաչ արահետ» հասարակական կազմակերպության կողմից ՀՀ գյուղատնտեսության նախարարության և Երևանի քաղաքապետարանի աջակցությամբ:
