ԵՐԵՎԱՆ, 12 օգոստոսի — Sputnik. 2015թ.-ի համեմատ 2016 թվականի նույն ժամանակահատվածում Հայաստանից 90 տոկոսով ավելի շատ պտուղ-բանջարեղեն է արտահանվել ԵՏՄ անդամ երկրներ: Այս մասին այսօր լրագրողներին հայտնեց գյուղատնտեսության նախարարի տեղակալ Արմեն Հարությունյանը՝ հստակեցնելով, որ արտահանումը հիմնականում իրականացվել է դեպի ռուսական շուկա, մինչդեռ մյուս անդամ երկրների դեպքում Հայաստանը զիջում է:
Ինչ վերաբերում է արտահանման աճին, փոխնախարարը նշեց, որ եզրակացության համար հիմք են ծառայել սահմանային գրանցումները:
Մինչդեռ մասնագետների կարծիքով` հաշվի առնելով այս տարի Վերին Լարսի ճանապարհի փակ լինելը` սահմանը հատելը դեռ չի նշանակում, որ այն տեղ է հասել:
«Օրինակ` ծիրանի հսկայական խմբաքանակ է ճանապարհին փչացել ու թափվել, նպատակին չի ծառայել»,- Sputnik Արմենիայի հետ զրույցում ասաց Ագրարագյուղացիական միավորման նախագահ Հրաչյա Բերբերյանը՝ կարծիք հայտնելով, որ նախարարությունը շտապում է իրեն դափնիներ վերագրելով:
Փոխնախարարը, սակայն, այս դիտարկմանն այնքան էլ համաձայն չէ և վստահեցնում է, որ աճն առկա է և դեռ կարող է ավելանալ:
«Աճ կա, և մեր արտադրողներին էլ դա կարող է նշան լինել, որ այդ շուկան զարգանում է, և, չնայած մենք ահագին ավելացրել ենք մեր արտահանումը, բայց շուկայի պոտենցիալը շատ ավելի մեծ է»,- ասաց Հարությունյանը:
Փոխնախարարը նաև տեղեկացրեց, որ Գյուղնախարարությունը միայն ԵՏՄ անդամ պետությունների ուղղությամբ չէ, որ փորձում է ակտիվացնել արտահանումը: Նրա խոսքով առաջիկայում նախատեսվում է ևս 10 երկրի հետ կնքել ազատ առևտրի իրականացման պայմանագրեր:
