ԵՐԵՎԱՆ, 5 օգոստոսի —Sputnik. Հայաստանի բռնցքամարտի օլիմպիական հավաքականն իր հերթական մարզումն անցկացրեց Rio Center համալիրում՝ Բարայում։
Ռիոյի օլիմպիական խաղերին հայ բռնցքամարտիկները պատրաստվում են ամենայն զգոնությամբ։
Ինչպես մեզ հետ զրույցում ասաց հավաքականի գլխավոր մարզիչ Կարեն Աղամալյանը, մարզումներն անցնում են նորմալ, տղաները լավ գիտակցում են թե ուր են եկել և ինչի համար։
«Տղաները պատրաստ են: Ինչ վերաբերում է մրցակիցներին, կարող եմ միայն ասել` օլիմպիական խաղերում թույլ մրցակիցներ չկան»,- ասաց նա։
Riocentro Pavilion-5-ում առանձնացված մարզումային սրահներ կան։ Հայաստանի հավաքականն իր մարզումն անցկացնում էր 210 համարի մարզասենյակում։
Բռնցքամարտիկի համար կարևոր գործոն է քաշային կարգը պահելը, շատ դեպքերում մրցումներից առաջ նրանք ստիպված են լինում կորցնել մի քանի կիլոգրամ։
Մեր մարզիկները բացառություն չեն։ Այդ իսկ պատճառով էլ տեղափոխվեցինք մեկ այլ տաղավար, որտեղ կային ֆիզիկական վարժություններ անելու հարմարանքներ։
