Անի Մեջլումյան, Sputnik.
Օլիմպիական խաղերի շունչը զգացվում էր դեռևս բրազիլական մեկ այլ` Սան Պաուլո քաղաքի Գուարգուլյոս օդանավակայնում, որտեղ վայրէջք կատարեց մեր ինքնաթիռը: Սան Պաուլո էին ժամանում Օլիմպիական խաղերի բազմաթիվ մասնակիցներ և լրագրողներ:
Օդանավակայանում Օլիմպիական խաղերի մասնակիցներին դիմավորում էին կամավորները և հատուկ ճանապարհով ուղեկցում դեպի անհրաժեշտ վայրը:
![Рио 2016. Волонтеры Рио 2016. Волонтеры - Sputnik Արմենիա](https://cdn.am.sputniknews.ru/img/457/65/4576564_0:0:2000:1332_600x0_80_0_0_4295c8d72ecf75f6d9ecb49dc1541c95.jpg)
Օլիմպիական խաղերի կազմակերպիչները հետաքրքիր լուծում էին գտել և օդանավակայնում մասնակիցների համար նախատեսված ճանապարհը առանձնացրել էին մանուշակագույն գծով:
«Հետևեք մանուշակագույն գծին և այն ձեզ կհասցնի անհրաժեշտ վայրը»,- ժպտալով ասում էին կամավորները:
Մեր հաջորդ կանգառը Ռիո դե Ժանեյրո քաղաքի միջազգային Գալեան օդանավակայանն էր: Այնտեղ արդեն խաղերի մասնակիցները, լրագրողները և այլ երկրներից ժամանած կամավորները կարող էին հաստատել իրենց անցագրերը:
Օգոստոսի 1-ի առավոտյան ժամանեցինք Ռիոյի մեդիա կենտրոն, որը բաղկացած է 2 մասնաշենքից: Առաջին մասնաշենքը նախատեսված է լրագրողների և ֆոտոլրագրողների համար, իսկ երկրորդը` հեռարձակման իրավունք ունեցող հեռուստատեսությունների և ռադիոկայանների համար:
Օլիմպիական պուրակը, որտեղ գտնվում են մարզադահլիճների մեծ մասը, տեղակայված է մեդիա կենտրոնի հարևանությամբ:
Բրազիլական ազգային հեռարձակող հեռուստաընկերության` SportTV-ի 2 գրասենյակ-տաղավարները գտնվում են հենց օլիմպիական պուրակի տարածքում:
Չնայած մարդիկ Ռիոյում շատ բարեհամբույր են և փորձում են ամեն կերպ օգնել, պետք է նշել, որ առաջին տպավորությունները օլիմպիական Ռիոյից ամենևին էլ դրական չեն:
Արդեն օգոստոսի 4-ն է, սակայն դեռ ամենուր շարունակվում են շինարարական աշխատանքները, ինչը հավելյալ բարդություն է ստեղծում թե՛ լրագրողների, թե՛ մասնակիցների տեղաշարժի համար: Համակարգված չեն տրանսպորտային երթուղիները: Դեպի մարզադահլիճներ տանող ճանապարհները երկարացված և անհարմար են:
Հավելյալ խնդիր է առաջացնում նաև այն, որ աշխատակիցների ու կամավորների մեծ մասն անգլերենին չի տիրապետում։
Այն աշխատակիցներն ու կամավորները, որոնք խոսում են անգլերեն, իրենց անցաթղթերի վրա ունեն «ես խոսում եմ անգլերեն» գրություն, սակայն անգամ նրանք բավարար մակարդակով չեն կարողանում հաղորդակցվել:
![Օլիմպիական խաղեր 2016 Օլիմպիական խաղեր 2016 - Sputnik Արմենիա](https://cdn.am.sputniknews.ru/img/457/70/4577028_0:0:2000:1257_600x0_80_0_0_c4587f9ebb06a1a5e2196518450697be.jpg)
![Օլիմպիական խաղեր 2016 Օլիմպիական խաղեր 2016 - Sputnik Արմենիա](https://cdn.am.sputniknews.ru/img/457/66/4576644_0:0:2000:1257_600x0_80_0_0_2b174a29a631f09c63b86111e7d64d92.jpg)
![Օլիմպիական խաղեր 2016 Օլիմպիական խաղեր 2016 - Sputnik Արմենիա](https://cdn.am.sputniknews.ru/img/457/72/4577285_0:0:2000:1257_600x0_80_0_0_aee09660601b6c90cd72c275bce6fd9b.jpg)
![Օլիմպիական խաղեր 2016 Օլիմպիական խաղեր 2016 - Sputnik Արմենիա](https://cdn.am.sputniknews.ru/img/457/69/4576901_0:0:2000:1257_600x0_80_0_0_856942a0c9311066bc130c6c5dd1c564.jpg)
![Օլիմպիական խաղեր 2016 Օլիմպիական խաղեր 2016 - Sputnik Արմենիա](https://cdn.am.sputniknews.ru/img/457/68/4576807_0:29:2000:1287_600x0_80_0_0_255064e3d0cf3b4400b64a21f28c1a09.jpg)
![Օլիմպիական խաղեր 2016 Օլիմպիական խաղեր 2016 - Sputnik Արմենիա](https://cdn.am.sputniknews.ru/img/457/71/4577148_0:0:2000:1257_600x0_80_0_0_cdd357da41e4ff16fd3e6cc9f352230e.jpg)
![Օլիմպիական խաղեր 2016 Օլիմպիական խաղեր 2016 - Sputnik Արմենիա](https://cdn.am.sputniknews.ru/img/457/72/4577216_0:0:2000:1257_600x0_80_0_0_dcb3dda11bdb3a87160dccaf8942cd6d.jpg)
Մեդիա կենտրոնում գտնվող ճաշարանի սնունդը բավական թանկ է ու անորակ: Ճաշացանկը աղքատիկ է և չկա ընտրության լայն հնարավորություն:
Ճապոնացի լրագրողներից մեկը ծիծաղելով ասաց.
«2020 թվականին կգաք Տոկիո (հաջորդ ամառային օլիմպիական խաղերը անցկացվելու են Տոկիոյում) և կտեսնեք, որ մեզ մոտ ամեն ինչ անվճար է լինելու և շատ որակյալ»:
Մեդիա կենտրոնում վարդակները հարմարեցված չեն աշխատանքի համար: Եվրոպական երկրներից ժամանած լրագրողները հավելյալ բարդություններ են ունենում և ստիպված են լինում տեխնիկական միջոցներ գնել, որպեսզի կարողանան վարդակներն օգտագործել և հոսանքի աղբյուր ունենալ: Իսկ այդ օժանդակ միջոցները վաճառվում են մեդիա կենտրոնին կից խանութ-սրահում սովորականից 3 անգամ թանկ գնով:
![Рио 2016. Журналисты Рио 2016. Журналисты - Sputnik Արմենիա](https://cdn.am.sputniknews.ru/img/457/67/4576712_0:0:2000:1455_600x0_80_0_0_726425cd665396dbda9859f4bd6d9e8a.jpg)
Գերմանացի լրագրողներից մեկը, որն արդեն 5-րդ օլիմպիական խաղերն է լուսաբանում, մեզ հետ զրույցում,ասաց, որ նման անկազմակերպ խաղեր առաջին անգամ է տեսնում։
«Ամեն ինչ ասես հատուկ անհարմար է այստեղ: Ինձ թվում է` Ռիոն պատրաստ չէր նման ծավալի միջոցառում ընդունելուն», — ասաց նա:
Օգոստոսի 5-ին հանրահայտ «Մարականա» մարզադաշտում կկայանա Օլիմպիական խաղերի բացման արարողությունը, հուսանք` մինչ այդ կկարգավորվեն թերությունները, և բոլորս կկարողանանք վայելել մարզական ամենամեծ ու գեղեցիկ միջոցառումը: