ԵՐԵՎԱՆ, 30 հուլիսի — Sputnik. Առողջապահության նախարարությունը հերքում է մամուլում տարածված լուրերն այն մասին, թե երեկ ՊՊԾ գնդին հարակից տարածքներում տեղի ունեցած բախումների հետևանքով մանկահասակ երեխաներ են տուժել: Իսկ Sputnik Արմենիայի հարցին, թե տուժածներից քանիսն են անչափահասներ, Առողջապահության նախարարության մամուլի քարտուղար Անահիտ Հայթայանը պատասխանեց. «Մեր տվյալներով միայն մեկն է 17 տարեկան»:
Ի դեպ, Անահիտ Հայթայանն իր ֆեյսբուքյան էջում նաև տեղեկացրել է, որ Խորենացու փողոցում և Սարի թաղում երեկ տեղի ունեցած միջադեպի հետևանքով տարբեր վնասվածքներով մայրաքաղաքի բժշկական հաստատություններ է դիմել 73 անձ:
Դիմածներից այս պահին դեռևս հիվանդանոցային բուժումն է ստանում 26-ը, որից 6-ը ոստիկաններ են։
«Սուրբ Գրիգոր Լուսավորիչ» բժշկական կենտրոն դիմած 50 քաղաքացուց 36-ը դուրս է գրվել, մեկը տեղափոխվել է Ճառագայթային բժշկության և այրվածքների կենտրոն։ Այս պահին այս հիվանդանում են մնացել 13 մարդ։ Դրանց թվում է նաև այն քաղաքացին, որը բախումների հետևանքով կորցրել է աչքը:
«Քաղաքացու աչքը վիրահատվել է, հեռացվել է վնասված ակնագունդը»,- հայտնում են նախարարությունից։
«Էրեբունի» բժշկական կենտրոն է դիմել 16 անձ, որ 12-ը` ոստիկան, 2-ը` զինյալ խմբից։ Այս պահի դրությամբ բուժումը շարունակում է 8-ը։ Ինչպես որովայնային հրազենային վնասվածքով ոստիկանը, այնպես էլ 2 զինյալը վիրահատությունից հետո վերակենդանացման բաժանմունքում են։
2 տուժած բուժումը շարունակում է «Հերացի» թիվ 1 համալսարանական համալիրում, 1-ական տուժածներ` «Արմենիա» հանրապետական, «Իզմիրլյան» բժշկական և Ճառագայթային բժշկության և այրվածքների կենտրոններում։
Նախարարությունը նաև հայտնում է, որ բացի վերակենդանացման բաժանմունքներում գտնվողներից, մյուսների վիճակը հիմնականում բավարարին մոտ է։
