ԵՐԵՎԱՆ, 21 հուլիսի — Sputnik. Այն փողոցում, որտեղ անցած գիշերը բողոքի ակցիա էր ընթանում և բարիկադներ էին կառուցվել, երթևեկությունն ամբողջությամբ վերականգնվել է։
Ներկա պահին հավաքվել են ցուցարարների կառուցած պատնեշները, տեղափոխվել են աղբամաններն ու նստարանները։ Երևանի կոմունալ ծառայությունները մաքրում են տարածքը, լվացել են փողոցը։
Դեպի զինված խմբի գրաված շենքը տանող ճանապարհը հսկվում է ոստիկանության կողմից։
Ոստիկանությունը հուլիսի 20- լույս 21-ի գիշերն առավոտյան ժամը 4։30-ի սահմաններում հատուկ գործողություն իրականացրեց Քրիստափորի և Խորենացու փողոցների խաչմերուկում և րոպեների ընթացքում ցրեց ցույցը։ Մինչ այդ հուլիսի 20-ի երեկոյան բախում տեղի ունեցավ ոստիկանության և ցուցարարների միջև։ Իրավիճակը սրվեց այն բանից հետո, երբ ցուցարարները պահանջեցին լուծել ներսում գտնվող անձանց սննդի խնդիրը։ Հետո Նրանք քարեր նետեցին ոստիկանների վրա, նրանք էլ պատասխանեցին լուսաձայնային և ծխային նռնակներով։
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։ ՀՀ իրավապահ մարմինների աշխատակիցները բանակցում են զինված խնբի անդամների հետ։
