ԵՐԵՎԱՆ, 11 հուլիսի- Sputnik. Փառատոնի երկրորդ օրը սկսվեց ռեժիսորների մամուլի ասուլիսով, որոնք մասնակցում են տարբեր մրցութային ծրագրերի:
Վավերագրական ֆիլմերի ծրագրում ցուցադրեցին Մուհամեդ Ուզինի «Սամիրը փոշու մեջ» կինոնկարը, ինչպես նաև Պիտեր Յան Դե Պյուի «Լուսավորյալների երկիրը» ֆիլմը, որը հինգ երկրների համատեղ արտադրություն է և նկարահանվել է ութ տարի:
Տետ-ա-տետ հանդիպումները բացեցին հայ-թուրքական կինեմատոգրաֆիական հարթակը: Այդ հանդիպումների շրջանակում հայ և թուրք կինեմատոգրաֆիստները քննարկում են համատեղ նախագծերի իրագործման հնարավորությունները, ինչպես նաև մշակութային երկխոսություն հաստատելու ուղիները:
Դրան զուգահեռ Մոսկվա կինոթատրոնի Կարմիր դահլիճում ռեժիսոր Լարա Իզագիրեի «Աշունն առանց Բեռլինի» ֆիլմով մեկնարկեց նոր բասկյան կինոյի ծրագիրը:
«Մեր օրերի հայկական կինոն» ծրագիրը բացվեց Վարդան Հովհաննիսյանի «Մարդկանց պատմություն պատերազմի և խաղաղության օրերից» ֆիլմով:
Այդ ընթացքում ԶԼՄ-ների ներկայացուցիչները հավաքվել էին մոտակա հյուրանոցի նախասրահում: Պրես-կոկտեյլի շրջանակում լրագրողները շփվեցին փառատոնի հյուրերի հետ:
Երկրորդ փառատոնային օրվա շրջանակում հայկական կինոարտադրությունը ներկայացվեց Վահե Յանի «Արմատներ» ֆիլմով: Ցուցադրությունը նվիրված էր «Ոսկե ծիրանի» և «Շարմ» ընկերության համագործակցության 10-ամյա հոբելյանին:
Երեկոյան գործողությունները վայրը տեղափոխվեց «Մոսկվա» կինոթատրոն: Վավերագրող ռեժիսր Վիտալի Մանսկու «Արևի շողերի տակ» սկանդալային ֆիլմն իրարանցման առիթ դարձավ: Կինոնկարի առանձնահատկությունն այն է, որ նկարահանումներն ընթացել են Հյուսիսային Կորեայում, որտեղ օրենսդրական մակարդակով արգելված է տեսագրություն կատարել:
Ֆիլմը բուռն քննարկումներ առաջացրեց, հանդիսատեսը դահլիճից դուրս էր գալիս՝ քննարկելով Մանսկու համարձակությունը:
ԹՈՒՄՈ ստեղծարար տեխնոլոգիաների կենտրոնում «Ոսկե ծիրանի» շրջանակում ցուցադրվեց Արամ Շահբազյանի «Մոսկվիչ, իմ սեր» ֆիլմը: Ցուցադրության ավարտից հետո կինոյի սիրահարները և լրագրողները ժամանեցին հայտնի իրանցի դերասան Հոմայուն Էրշադիի հետ հանդիպմանը: Նա հաճախ նկարահանվել է իրանցի ռեժիսոր, երևանյան կինոփառատոնի մեծ ընկեր Աբաս Քիառոսթամիի ֆիլմերում, ով վերջերս հեռացել է կյանքից:
Գերմանացի ռեժիսոր Ֆրեդ Քելեմենը վարպետության դասից հետո ժամանեց կինոթատրոն՝ իր ֆիլմերի հետահայաց ցուցադրությանը: Ցուցադրությունից հետո «Ոսկե ծիրան» կինոփառատոնի հիմնադիր, ռեժիսոր Հարություն Խաչատրյանը Քելեմենին հանձնեց «Վարպետ» մրցանակը՝ համաշխարհային կինոարվեստում ունեցած ավանդի համար:
Փառատոնային օրվա ավարտին առավել դիմացկուն կինոսերները մնացին դիտելու մեկ այլ երևանյան պրեմիերա՝ Դմիտրի Իզմեստևի ֆիլմը, իսկ դասական ֆիլմերի երկրագուները շտապեցին Սիրահարների այգի՝ դիտելու Ֆրանկո Ձեֆիրելլիի «Ռոմեոն և Ջուլիետը» ֆիլմը:
