ԵՐԵՎԱՆ, 11 հուլիսի-Sputnik. Գոհար Սարգսյան. «Հայաստան-Թուրքիա կինոպլատֆորմ»-ի բացման արարողությունը մեծ ոգևորությամբ դիմավորեցին և՛ հայ, և՛ թուրք կինոգործիչները։
Րաֆֆի Հերմոն-Արաքսն իրեն համարում է աշխարհի քաղաքացի. ծնվել է Թուրքիայում, որոշ ժամանակ ապրել Փարիզում, իսկ արմատները խոր ձգված են Հայաստանում։ Մեզ հետ զրույցում նա վստահություն հայտնեց, որ արվեստը կարող է միացնել թշնամական հարաբերություններ ունեցող ժողովուրդներին։
«Թուրքիա և Հայաստան ասելիս պետք է անջատել պետությունը, կառավարությունը, ժողովուրդն ու ժողովրդի դեմոկրատ հատվածը։ Հիմա Թուրքիայում շատ բան է փոխվել։ Օրինակ, տարիներ առաջ հայոց ցեղասպանության լինել-չլինելու մասին դժվարանում էինք խոսել, մենակ էինք զգում մեզ, հիմա ասում եմ`ախպեր ջան, ես կարող եմ տալ ամենաքիչը 100 թուրք պրոֆեսորի անուն, որոնք հայկական ցեղասպանությունն ինձանից լավ գիտեն ու կապացուցեն փաստաթղթերով»,-ասաց նա։
Ասաց ու մեջբերեց իր գործընկերներից մեկին` թուրք վավերագրող ռեժիսոր Մելեք Թայլանին։ Հայաստանի, մասնավորապես Երևանի մասին խոսելիս տիկնոջ աչքերը փայլեցին։ Պատմեց, որ սիրահարված է մեր մայրաքաղաքին, երազում է ավելի երկար ժամանակով այցելել, շրջագայել ու ավելի մտերմանալ հայերի հետ։
«Տարիներ առաջ Հայաստանից արվեստագետներ էին եկել Ստամբուլ։ Նրանց խնդրեցի, որ պարտադիր կերպով իմ տանը գիշերեն։ Հիմա նրանք իմ ընկերներն են։ Հենց այսպես պետք է սկսել հարաբերությունները»,-ասաց նա։
Վավերագրող ռեժիսորը կարծում է, որ հայ-թուրքական պլատֆորմը ևս ունակ է միավորելու երկու ժողովուրդներին։ Եվ ստեղծվելիք ֆիլմերը կպատմեն նրանց մասին։
«Ես վստահ եմ, որ հայերն ու թուրքերը կարող են կրկին դառնալ լավ հարևաններ»,-ասաց նա։
Մեր այն հարցին, թե Հայաստան այցելող ու հայերի մասին ֆիլմ նկարահանող ռեժիսորներն իրենց երկրում ճնշումների չե՞ն ենթարկում, նա պատասխանեց, որ «Ոսկե ծիրանի» շրջանակում ներկայացած ռեժիսորները նման խնդիրներ վստահաբար չեն ունեցել։ Մյուսների մասին չի կարող պնդել։
