ԵՐԵՎԱՆ, 11 հուլիսի — Sputnik. Հուլիսի 10-ի երեկոյան` ժամը 20.30-21-30-ի սահմաններում գրանցված ուժեղ կարկտահարությունը վնասաբեր է եղել հատկապես Աշտարակի տարածաշրջանում, հայտնում են Արագածոտնի մարզպետարանի մամուլի ծառայությունից։
«Մեծապես տուժել են Աշտարակ քաղաքը, Արագածոտն, Սասունիկ, Օշական, Փարպի, Բազմաղբյուր, Աղձք, Ոսկեհատ, Ոսկեվազ, Ագարակ, Կարբի, Օհանավան, Արտաշավան և այլ համայնքները»,- ասված է հաղորդագրությունում:
Ըստ հաղորդման` մարզպետ Գաբրիել Գյոզալյանը այցելել է տուժած բնակավայրեր` վնասների մասին տեղում ծանոթանալու, համապատասխան գործողություններ կազմակերպելու նպատակով:
Նախնական տվյալներով` գրեթե ամբողջությամբ վնասվել են նշված համայնքների գյուղատնտեսական մշակաբույսերը, ցանքատարածություններն ու պտղատու այգիները: Ուժեղ քամին և կարկուտն էական վնասներ են պատճառել նաև շինություններին: Տեղահան են եղել շենքերի տանիքներ, տուժել են համայնքային ենթակառուցվածքներ:
Մարզային հանձնաժողովի կողմից ուսումնասիրվում են աղետի հետևանքները, ճշգրտվում վնասների չափերը:
