ԵՐԵՎԱՆ, 5 հուլիսի-Sputnik. Արթիկում նոր ջրհեղեղների կրկնության վտանգը պահպանվում է, երեքշաբթի լրագրողներին ասաց Արթիկի քաղաքապետ Արսեն Աբրահամյանը։
Մայիսի վերջին տեղացած հորդ անձրևը և դրան հաջորդած ջրհեղեղը վնասել է Արթիկ գյուղի 20 տուն։ Բարեբախտաբար, ոչ ոք չի տուժել։ Ջուրը և սելավաջրերը ամբողջովին ավերել են 4-5 տուն։ Հունը փոխած գետը հոսում էր տների և բանջարանոցների միջով, իսկ ցեխի և քարերի մակարդակը որոշ տեղում կազմում է 1,5 մետր։
Նրա խոսքով` ջրհեղեղի պատճառն այն է, որ վերջին տասնամյակների ընթացքում այն կիրճում, որտեղով հոսում է գետը, կուտակվել են մոտակա քարհանքերի թափոնները։ Դրա հետևանքով գետի հունը փոխվել է, ինչը հանգեցրել է քաղաքային ջրանցքի փակմանը։
«Պահպանվում է նոր սելավի և ջրհեղեղի կրկնության վտանգը։ Նման երևույթները կանխելու համար անհրաժեշտ է մասնագետների աշխատանք` տուֆի թափոնների հարցը լուծելու համար, որն արդյունահանել են դեռ խորհրդային տարիներին»,- ասաց Աբրահամյանը։
Նա հաղորդեց, որ տվյալ պահին հետևանքները վերացնելու աշխատանքներին մասնակցում է երեք էքսկավատոր, ութ բեռնատար։ Շարունակվում է մանկապարտեզի և դպրոցի տարածքի մաքրումը։
«10 օր է անցել։ Առայժմ հնարավոր չէ հաշվարկել վնասի ստույգ չափը, քանի որ դեռ կատարվում են աշխատանքներ։ Կա կառավարության որոշումն այն ընտանիքներին օգնություն հատկացնելու մասին, որոնց տները տուժել են»,- ասաց Աբրահամյանը։
Նա պարզաբանեց, որ խոսքը 12 բնակիչներին օգնություն տրամադրելու մասին է, որոնց տները շարքից դուրս են եկել, վնասվել է բերքը, սատկել են ընտանի կենդանիները։
Աբրահամյանի խոսքով` շատ բնակիչներ սպասում էին, որ իրենց նոր տներ կտրամադրեն, սակայն նրանց գումար են հատկացրել` վնասված տները վերականգնելու համար։
Պատասխանելով Sputnik Արմենիայի հարցին, որ քաղաքապետարանի աշխատակիցները մինչ այդ հայտարարել էին 4-5 տան ավերման մասին, Աբրահամյանը հայտարարեց, որ դա նրանց սուբյեկտիվ կարծիքն է, իսկ հանձնաժողովը հակառակ գնահատական է տվել։
«Տրամադրված օգնությունը բավական է այդ տները վերանորոգելու համար։ Դրանցից շատերը վերանորոգվել են դեռ 60-ականներին»,- ասաց Աբրահամյանը և ընդգծեց, որ դրանք բոլորը պիտանի են ապրելու համար։
Քաղաքապետի կարծիքով` համաճարակի, հիվանդությունների և վնասված տների բնակիչների առողջությանը վտանգի սպառնալիք չկա։
Ավելի վաղ տարածքային կառավարման նախարար Դավիթ Լոքյանը ներկայացրել էր կառավարության որոշումը, որի համաձայն` 9 ամսվա ընթացքում Շիրակի մարզպետարանին կտրամադրվի 4 մլն 600 հազար դրամ` վնասի փոխհատուցման համար։ Միաժամանակ տեղեկատվություն չի տրամադրվել տուժած ընտանիքների քանակի մասին։
