ԵՐԵՎԱՆ, 6 հուլիսի — Sputnik. Շոգը ոչ միայն ստիպում է երազել կապուտակ ծովի ու օդորակիչի մասին, այլև հիշեցնում է, որ ամռանը բնորոշ տարատեսակ հիվանդություններ կան։ Հայ մասնագետների տվյալով` Հայաստանի ինֆեկցիոն հիվանդանոցն ամեն օր 2-3 մարդ է ընդունում «թունավորում» ախտորոշմամբ։
Ինֆեկցիոնիստ Մելանիա Շմավոնյանը լրագրողների հետ զրույցում նշեց, որ անցյալ տարվա համեմատ, այս տարի Հայաստանում արտակարգ իրավիճակ չի գրանցվել, սակայն տարեցտարի աճում է աղեստամոքսային տրակտի խնդիրներ ունեցող մարդկանց քանակը։
«Մեզ մոտ դեռ մեծ թվով հիվանդներ չկան։ Բոլորս գիտենք, որ ամռանը Հայաստանում կերակուր պատրաստելիս բանջարեղեն, մրգեր և կանաչեղեն են օգտագործում և հաճախ են խնդիրների առաջ կանգնում։ Երբեմն այդ խնդիրներն առաջանում են վատ լվացած մթերքի կամ պատրաստված կերակրատեսակները սխալ պահելու պատճառով», — նշեց Շմավոնյանը։
Բժշկի խոսքով` այդ ամենի հետևանքով ավելանում է բուժհաստատությունների դիմող մարդկանց թիվը։
Զգուշացե՛ք. ամառ է
Շատ կարևոր է, որ կերակուրը պատրաստող մարդն առողջ լինի, ուտեստները պահվեն սառնարանում, ընտանիքի անդամներն էլ հետևեն հիգիենայի կանոններին։
Նախապատվություն է պետք տալ թարմ սննդին, չգնել մայոնեզով աղցաններ, պահածոներ և կիսաֆաբրիկատներ։
Պետք է շատ հեղուկ օգտագործել, չչարաշահել ոգելից խմիչքը, հատկապես` ցերեկային ժամերին, ինչպես նաև հրաժարվել լցնովի պաղպաղակից ու գազավորված ըմպելիքներից։
Ծովամթերքը պետք է թարմ լինի։ Ձուկը նույնպես պետք է պահել սառնարանում և շոշափելիս այն պետք է կպչուն չլինի։ Ձկան թարմությունը կարելի է որոշել խռիկների միջոցով. դրանք պետք է ոչ թե կարմիր լինեն, այլ` վարդագույն։
Ինչպես նաև…
Փորձագետները նաև խորհուրդ են տալիս մթերքը ճիշտ դասավորել սառնարանում. Պատրաստի կերակուրներն ու կիսաֆաբրիկատները` վերևի դարակներում, հում մթերքը` ներքևի։
Պետք է հիշել գլխավոր կանոնը, այն է` ձեռքերը հաճախ լվանալ, քանի որ կա այսպիսի հասկացություն` «կեղտոտ ձեռքերի հիվանդություն»։
Այնուհանդերձ, եթե դուք թունավորման նշաններ եք զգում, անհապաղ դիմեք բժիշկի և որքան հնարավոր է շատ ջուր խմեք։
